والتقينا

التفاصيل اللى قبل اللقاء ال جى وسلوى قالوها ومفيش داعى لتكرارها

المهم

انا كنت خايفه اوى من اللقاء ده اول مره اقابل حد من عالمى الافتراضى

يمكن ساره صاحبه مدونه محاولات للبحث عنى كنت بتابعها من زمان ومع ذلك كنت منتظره مفاجاه منها فى اللقاء ده مش عارفه ايه بالضبط ولاحاجه حلوه ولا وحشه بس

حاسه بمفاجاه وخلاص لكن ال جى مكنتش للاسف اعرف ان لها مدونه خاصه

EMARALD.OASIS

كنت بتابع بوستاتها فى كلام البنات مع سلوى وكونت فكرتى عنها من هناك

انا وسلوى نعرف بعض من سنين معرفه شخصيه واعرف نجوى اختها اكتر لانها صاحبتى من ثانوى

رحنا سوا وكانت ساره اللى هى رحيل يعنى اتصلت بسلوى طوق الحريه وقالت انها خلاص وصلت ادام الحديقه

انا بقى قلت لسلوى ونجوى_على فكره نجوى مش مدونه_ متقولوش اسميكم لما نشوف هتعرفنا ولا لاء

عرفت سلوى بسرعه اصلها مكنتش عايزانى احيرساره كتير وبرضه ال جى لما جت عرفت سلوى بسرعه المهم

انا كانت فكرتى عن ال جى من كلام البنات

جد اوى وحزينه دايما ويبدو ان ده حقيقى بجانب صفات اخرى عرفتها من اللقاء

تملك روح ساخره وقدره غريبه على جذب الانتباه لكلامها بصراحه مكنتش عايزاها تسكت

كمان منظمه ودقيقه وماشاء الله قويه الملاحظه ويمكن كتر ملاحظتها بتخليها تنسى بسرعه زى ما قلتلها

منطلقه بس باحترام وده بقى حاجه صعب اوى تلاقيها

اما ساره من كلامها فى مدونتها متقلبه عنديه رغم رقتها وطيبتها فكنت متوقعه انها هتبقى القائد بتعنا ودىالحاجه الوحيده اللى حصلت من توقعاتىوضحت ساعه قطع تذاكر الجنينه والاكل واحنا نتمشى كنت بتخرم من شوارع جانبيه واحنا وراهاو

لكن المفاجاه بقى انها هاديه جدا ومكنتش بتتكلم غيرلما نوجه لها سؤال انا بصراحه هريتها اسئله لانى كنت عايزه اعرفها كويس

كان نفسى اللقاء يبقى اطول رغم اننا قعدنا سوا6 ساعات

والنتيجه

انى اكتشفت ان الحقيقه اجمل بكتير

وانى رغم ان كانت فكرتى عنهم كويسه بدليل متابعه مدوناتهم

لكن كمان حبيت اوى تفاصيلهم وكلامهم وحتى شكلهم وضحكهم

ومشكلتى لما احب اوى كده ابقى عايزه اشوفهم كتير وده صعب

بشكر ربنا انى اتعرفت عليهم وان كل مفاجات اللقاء بالنسبه لى كانت جميله