Friday, October 31, 2008

همهمات مبعثره

لست ملاكا ولم ادع ذلك يوما فلا تحاسبيننى على ما لم ادعيه
*
*
اللهم اجعل الموت راحه لنا من كل شر
*
*
يا الام النفس ابتعدى عن روحى وعن جسدى
*
*
ما اقسى الجرائم التى لا يعاقب عليها القانون
*
*
مددت يمناى وتسلمت العهد فهل استطيع ان اوفى؟؟؟؟
*
*
لم اتحمل وحشه القبر وحيره المصير دقائق،فكيف ساتحمل للنهايه؟؟؟
*
*
انتى طيبه اوى يا مى يا ريتنى اقدر اعمل لك اى حاجه
*
*
عندما ترى دموعى فلا تشغل بالك بالامر ربما يوما اكون سعيده
*
*
افضل حب لحد ما قلبك تصبح فيه ازمه سكان،بس يا ترى هتقدر توصل المرافق لكل السكان؟؟؟؟؟؟؟
*
*
ريما.. عرفتك شهرين وافترقنا من سنه وشهرين ولسه وحشانى وكلكم وحشينى يا ترى لسه فاكره جين اير؟؟؟؟
يا ريت نتقابل هناك ويا ريت نوصل هناك
*
*
ما ايسر ان نكون سعداء
*
*
عندما يصفق لك الجميع فليس بالضروره اعجاب ،ربما لا يريدون سماع انينك

Wednesday, October 22, 2008

حبيبتى احاسيس

التورته دى لكل المدونين اعتقد هتكفى

انما دى انا هشيلها فى التلاجه عشان اللى هيجى متاخر يلاقينا
سايبين له حقه



فى مثل هذا اليوم منذ عام ولدت مدونتى الحبيبه فى نفس شهر ميلادى وكانى معها اولد من جديد


بدون تخطيط منى او قصد




وارسم خطواتى فى عالمى الافتراضى اختار منه افراد اسرتى الالكترونيه بكل حريه




هنا وصلت لنظريه او سؤال_هو احنا صحيح ورق كوتشينه؟؟؟




كل منا يوجد منه اكثر من نسخه تماثله فى العدد لكنها تختلف فى بعض الرتوش وكل منا يبحث عما يماثله او يشابهه كى يشعر بوجوده بين البشر




او لنقلها بطريقه اخرى الارواح جنود مجنده ما تالف منها ائتلف وما تنافر منها اختلف




وبدلا من هذا الكلام المرسل اسمحوا لى ان اكتب ما اريد من خلال اجاباتى على تاج التدوين فهو اكثر ما يعبر عن هذه المناسبه




شكرا ل




المصرى




sometimes



ونبدا التاج




بدأت تدون من امتي ؟ و دخلت العالم ده ازاي




بدات التدوين زى ما قلت من سنه والمدونه دىاول بوست فيها بتاريخ 23 اكتوبر




ودخلت عالم المدونات عن طريق اتنين اولا اخويا اللى كان بيلح عليه ويقولى المدونه اكتر حاجه تناسبك بس ورانى كام واحده اتخضيت وقلت له لاء ،وبعد كده سلوى طوق الحريه كلمتنى عن مدونتها كذا مره ولما شفتها عجبتنى وبدات فعلا اعمل مدونه واخويا ساعدنى




وبالمناسبه بشكر سلوى انى بدات اعرف الناس من عندها لان ده ساعدنى اعرف ناس محترمين جدا




وحتى لما بدات اعرف ناس بعيد عن سلوى الحمد لله برضه ناس احسبهم على خير




ايه كان انطباعك في البدايه؟




متلخبطه ومكسوفه جدااااا وفرحانه زى العيال بحاجه جديده




مين اكتر واحد بتهتم بتعليقه علي بوستك الجديد؟




والله كتير ويمكن كل بوست ببقى مستنيه راى حد معين يختلف من بوست للتانى حسب الموضوع وساعات بتوقع رد ناس معينه او ابقى حاسه ايه اكثر جزء هيلفت انتباههم فى البوست، بس لما اكتب بوست جديد بحس زى اللى عامل حفله ومستنى اهله وزى ما بيفرح بوجود اللى حضروااوى بيزعل اوى لما حد فيهم ميجايش لانه فعلا عايز يشوفه صحيح بحاول اعذرهم لكن برضه بيوحشونى




ايه أهم حاجة اتعلمتها من عالم التدوين؟




انى ممكن اعمل حاجه بحبها واقضى وقت بتكلم فى الحاجات اللى شاغلانى واسمع افكار جديده وان الواحد يقدر يعبر عن نفسه ويلاقى اللى يشاركوا بفكره او نصيحه او نقد يفيده او كلمه طيبه ترفع معنوياته


وبعدين فيه طريق طول عمرى بحلم اعمل فيه حاجه والحمد لله بدات وكان التدوين بطريقه غير مباشره هو السبب ادعو لى ربنا يثبتى ويقوينى






واتعلمت كمان ان العالمالالكترونى ده عالم بجد فيها الحلو والوحش والحزن والفرح وانى اذا كنت بحس الدنيا اللى بره صعبه وكتير بحس فيها بالعجز، فانا هنا بمر كتير بنفس الحاله ويمكن بتبقى اصعب لان اللى حواليه خارج عالم التدوين بيشفوا ده غريب وبحس انى خارج المدونه لوحدى



ايه أكتر حاجة كرهتها ؟




انى شفت ناس سهل اوى تغلط فى غيرها وتاذى لمجرد الاختلاف فى الراى وناس شايفه ان الحريه مالهاش حدود ولا ادب واصول وناس انانيه وناس قاسيه اوى





حاسس ان التدوين له تأثير ؟


هعتبره سؤال شخصى وهقول
عندما اراكم فى احلامى


وتؤنسنى اطيافكم طول نهارى


واستشعر وجودكم فى كل احوالى


الا يعنى ذلك الكثير؟؟؟








Thursday, October 16, 2008

امك ثم امك ثم امك


زى اى اتنين متجوزين جديد كانوا بيتمنوا يبقى عندهم اولاد لكن مكنش فيه حمل بيكمل وبدؤا رحله الدكاتره والعلاج واللى يقول الموضوع صعب واللى يقول انتى عمرك ما هتخلفى انسى الموضوع احسن ،كانت بتوافق تعمل اى عمليه مهما كانت خطيره
وفاتت سنين
قالولها روحى للشيخ فلان تقول انا هطلب من رب الشيخ وهو اللى هيدينى من كرمه
جوزها اشفق عليها من الاجهاض المتكرر والعمليات الصعبه وقال للدكتور اكتب لها حاجه تمنع الحمل خلاص مش عايزين اولاد
رفضت وقالت هستحمل التعب واملى فى ربى كبير
اول حمل كمل وولدت ولد زى القمر كان كل اللى يشوفه يتعجب وهى كانت بتخاف عليه من نفسهاوتخيلوا فرحتهم بيه وبعد 3 ايام صرخ ومات
انهارت بس ايمانها كان اكبر من المها
قالولوا لها قولى يارب ولد يجيب الغاره من اخر الحاره
قالت انا تعبت اوى عايزه ولد صالح يعوضنى مش يعذبنى ومش كتير على ربنا كرمه واسع
وتانى مره الحمل يكمل والدكتور متابعها يوم بيوم
قالها لازم تولدى هنا عشان الرعايه لو ولدت بالدايه زى المره اللى فاتت المولود هيموت تعالى ومش عايز منك فلوس
وحدد لهم ميعاد الولاده وجهزوا الادويه والحاجات المطلوبه للام والجنين
بس الولاده جت فجاءه وبدات تصرخ ومفيش تليفون ولا وقت للدكتور طلبت من اختها تنادى للدايه اللى جنبهم رغم تحذيرات الدكتور لكن مفيش وقت وقبل ما العربيه اللى هتوديها للدكتور تيجى وقبل ا الدايه ما توصل
وصل المولود لوحده بالسلامه قصدى المولوده اللى هى اختكم منى انا يعنى زى النهارده من 28سنه
وفرحه ماما وبابا والعيله اللى كانت بتستنى اول حفيده هى الحاجه اللى محسسانى ان
وجودى له قيمه لحد من البشر
وكمان بقى عندى اخوات ومن غير علاج ولا عمليات
معلش دخلتكم فى تفاصيل بس حاسه ان ماما دى رائعه وان اليوم ده عيدها هى ربنا يكرمكم ادعوا لماما تبقى دايما بخير وادعوا لى ابقى انا السبب فى حجها زى ماهى بتتمنى وانى ابقى ابنه باره بيها وبابا
معلش غصب عنى مفيش تورت بس ادعوا المزاج يتعدل و ان شاء الله ربنا يدينا العمر والصحه و هعوضها لكم يوم 23 اكتوبر مناسبه حلوه برضه للى هيجى بقى
تحياتى

Sunday, October 5, 2008

ولدى الذى لم اراه

ايا طفلا تغمر دموعه عينى فى المراه
فارى حزنا وصدرا تشقه الف اه
ارى جرحا وجسدا نحيلا واه
هون عليك فالعمر لم يبلغ منتهاه
*
*
دعوت الله فى الفجر وفى العصر
ينجيك من كرب ومن قهر
يطهرك من ذنب يعذبك
ويهديك الخير والبِشر
*
*
ايا ولدى والحبل الود يربطنا
الا تشفق على ام تعذبها؟
ففى قلق عليك وفى الم
فعد سريعا معافى كى تسعدها