Friday, May 23, 2008

تاج وتاج وتاج

تاج المصرى
تخيل نفسك رئيس جمهوريه
1_أول خمسة قرارات ستأخذها .
1هطلب بيانات بمرتبات موظفيين الدوله كلها من اكبرهم لاصغرهم واحاول احقق عداله فى الاجور
2 هخلى وزير فى مجال خبرته يعنى وزير التعليم مثلا لازم يكون مدرس
3هسمع كل واحد من افراد الشعب ومش استكبر ان اخد برايهم
4اطبق الدستور والقانون على الجميع
5 اوقف سياسه الخصخصه فورا
2-من هم أول خمسة وزراء ستعزلهم فور توليك مقاليد الحكم.
لو بنتكلم عن مصر فالمشكله مش فى اشخاص المشكله فى سياسه عامه الكل بيطبقها فاكرين المهندس الوزير السابق احمد الليثى اللى كان وزير زراعه واول قرارته وقف استيراد المبيدات الخطيره المحرمه دوليا وفورا اتعزل بتهمه بلبله الراى العام3
_ما هى أول خمسة أماكن ستزورها عندما تصبح رئيسا للجمهوريه.
مدن الصعيد المنسيه
الوادى الجديد
شلاتين وحلايب
اراضى شباب الخريجين الخريجين
الواحات
4_كون جمهوريه لنفسك ومن وزير الداخليه ومن وزير الخارجيه ومن وزير العدل ومن وزير التربيه والتعليم ومن وزير التعليم العالى (سواء من أصدقائك أو أقاربك).
وزير الداخليه نجوى صاحبتى
وزير الخارجيه خالتى
وزير العدل ماما بس نسميها وزاره العدل والرحمه
وزير التعليم بابا
5_من هم أول خمسة رؤساء ستقطع معهم العلاقات الدبلماسيه
مش هقطع علاقاتى مع حد الا فى الضروره القصوى
بس هحاول احسسهم ان العلاقات دى مهمه وان اللى هقطعها معاه هيبقى خسر كتير
6_من هم أول خمسة دول ستنول عطفك واهتمامك ومساعدتك "باعتبارك دوله غنيه"
مصر
السودان
الصومال
فلسطين
وكتير من دول افريقيا
*************************
تاج النجم القادم

لوأعطيتك ثلاث وردات من هم الثلاث الأشخاص اللى هتهديهم الورد اللى معاك
ورده لماما
ورده لبابا
ورده لخالتى اللى معندهاش اولاد وبتعتبرنى بنتها


لو أعطيتك ورقة بيها 3 سطوروقلت لك أكتب فيهم اللى أنت عيزه هتكتب إيه
بحبكم
سامحونى
ادعولى

ما هو هدفك فى الحياة
ادخل الجنه
إن شاء الله بكرة هيكون أحسن من النهارده"ِهل تصدق هذه المقولة ؟؟ ولماذا
ايوه عندى امل فى ربنا
من المغنى اللى بتحبه أوى و إيه أحلى أغنية ليه بتحبها ؟؟
مشارى العفاسى بحس انه وجه من الجنه وخصوصا كليب طلع البدر علينا
غزة" تمثل لك إيه فى حياتك
وجع وجرح لا يندمل
ومش غزه لوحدها
لو تزوجت و أنجبت بنتين و ولدين أى الأسماء تختار لهم ؟؟
انا جاوبت السؤال ده فى تاج قديم
المهم يبقى فيهم عمر وابوهم حر فى الباقى
لو أتعرض عليك رشوة كبيرة و انت فى زنقة ماليه هتعمل إيه
هقول لنفسى اوعى يا منى من يتق الله يجعل له مخرجا
قول 3 صفات ب 3 كلمات بس توصف بيهم شخصيتك
مش عارفه
اول مرتب ليك وكان كبير يكفي تجيب اغلى هدايا هاتجيب لكل فرد في عيلتك ايه؟لو كبير اوى يعنى
لماما عمره لو ينفع
لبابا كتب
لاخواتى موبايلات جديده
ايه المجال اللى غير دراستك وشايف نفسك فيه قوي ؟
اللى بشتغله وبعمله دلوقتى
بتحب السفر؟
جدا ولو ان مش دايما بقدر عليه
طب دلوقتى حالا ايه المكان اللى نفسك تكون فيه
الجنه
ولو لازم الدنيا
يبقى قدام البحر
**********************

تاج الاحلام
من مدحت محمد ورفقه عمر والمستنصر بالله
اذكر خمس احلام من ماضيك وتحلم فيها بتغيير اشياء ماذا ستعدل وماذا ستترك؟

الاجابة
1 كنت بحلم يكون عندى فلوس كتير بس عرفت ان الفلوس مهما كترت لو ربنا مش امر لى مش هقدر احقق بيها اللى انا عايزاه
2
حلمت اكون صحفيه وعملت محاولات كتير واتصلت بصحف وسافرت لكن بعد ما حطيت رجلى على اول الطريق حسيت ان الخطوه دى مش مضبوطه وانى مش مرتاحه نفسيا للصحيفه دى والمسئول عنها فاكتفيت انى ابقى اراسل الصحف زى اى قارئ
3اتمنيت لو اتجوزت فى الدنيا اتجوز معاق من اصحاب الحالات القاسيه اللى صعب يلاقوا فرصه للزواج مش شفقه واحسان لكن كنت بقول لنفسى ان كل واحد عنده حاجه معينه ممكن يسعد بيها غيره وانا اعتقد ان لحاجه الوحيده اللى املكها وممكن اسعد بيها
هى انى هكون مهتمه جدا بمشاعره لكن اكتشفت بعد ما كبرت شويتين ان النيه الطيبه لوحدها مش كفايه
وان الواحد فى الحالات دى بيبقى محتاج بجانب الحنان زوجه ذات قوه نفسيه وبدنيه شديده تقدر تساعده دايما لان عجزها عن مساعدته فى اى وقت هيعذبه اكتر ويحسسه انه حمل تقيل عليها
أذكر خمس أحلام على الاقل ..تخص مستقبلك
بحلم ادخل الجنه1 واكون مع اجمل صحبه اللى اشتقت لهم اوى

بحلم احج انا وماما وخالتى2


3بحلم بمدينه كبيره وجميله اسمها مدينه الرحمه فيها مكان لائق للايتام والمسنين الفقراءومجهولى النسب والاطفال المشردين وذوى الاحتياجات الخاصه يكون وجودهم مع بعض سعاده ليهم يعنى المسنين اللى كانوا عايشين لوحدهم يلاقوا اطفال يكملوا معاهم رساله الابوه او الامومه والاطفال دول يلاقوا حد يحن عليهم ويهتم لامرهم بكل حب وحنان وذوى الاحتياجات الخاصه يندمجوا مع الاسوياء والكل يعيش بكرامه ويكون فيه شروط جامده جدا تضمن ان مفيش حد يشتغل فيها الا ذوى القلوب الرحيمه وياريت لو فى ناس عاديين برده رحماء يسكنوا فى المدينه دى عشان اصحاب الفئات الخاصه دى ميحسوش اننا بنعزلهم عن المجتمع مع ان الغرض حمايتهم

4بحلم كل انسان على الارض يبقى قاعد فى بيته مطمن ان مفيش حد هيفتح الباب عليه وياذيه ولا ياذى ولاده وهما بره وكل واحد ياخد حقه الضعيف زى القوى وان ميزان العدل اللى فى ايد البشر يتعدل
5 نفسى يكون اى عمل بعمله خالص لوجه الله وينجينى من الرياءويهدينا جميعا لما يحب ويرضى
أذكر شخصين على الأقل .متواجدين فى حياتك حاليا ..كنت تود وجودهم قبل الآن
المدونين اللى اعرفهم
أذكر شخصين على الأقل غير متواجدين فى حياتك حاليا كنت تود وجودهم الان
كل اللى عرفتهم وحبتهم فى حياتى واختفوا بسبب البعد او الموت
رجاء لكل من يزورنى او يعرفنى ولم يجب تلك التاجات بعد
اجيبوا كى اراكم جيدا

69 comments:

صاحب المضيفة said...

كل دي تاجات مرة واحدة


ربنا يكرمك على ردودك الجميلة والرقيقة


دمت بخير ويارب يرزقك بعمر عن قريب يارب

منى said...

صاحب المضيفه
تخيل كل دى تاجات
عايزه اسمى المدونه
احاسيس وتاجات
مرسيى جدا لذوقك
وان شاء الله عمر يجى بس لو ربنا امر وقابلت ابوه فى الحياه الدنيا
تحياتى

سلوى said...

ربنا يحقق لك أحلامك كلها يا منى

إنتي تستحقي كل خير

بس 3 يا منى

أوكازيون التاجات

ربنا يوفقك يا طيبه

دمتى بكل الخير

almasry said...

أخيرا جاوبتى التاج؟؟؟


لكن الجمهوريه بتاعتك دى هتكون آخر روقان ... بابا وماما وخالتى .. ده انتم رباطيه بقى


تحيـــــــاتى
المصـــــــــــرى

موناليزا said...

ياااه يامنمونة ماشاء الله عليكى انتى حلوة اوى بجد
ربنا يارب يسعدك ويحقق لكل ماتتمنى

blue-wave said...

حلوة التاجات دى بس دى افلاطونيه اوى يا منى

سنووايت said...

كل دي تاجات يا مني
بس كل اجاباتك بتقول اد ايه انتي انسانة بيضا اوي من جواكي ونقية اوي احاسيسك
ربنا يحققلك كل احلامك واللي ما اتحققش منها يتحقق بللي فيه الخير ليكي

khobayb said...

تاجات بالجملة ..

:)

إجابات جميلة ..

بس واضح إن الدولة هتبقى كوسة والوزرا كلهم قرايب !

وبعدين مش هنقطع علاقاتنا مع إسرائيل ولا ايه ؟

:)

---

دمتِ بكل خير

الفارس الملثم said...

تلات تاجات مره واحده وبرده نسيتي التاج بتاعي , مكنش العشم مممممم

بجد من غير مجامله اجابتك اكدتلي انك انسانه طيبه اوي وعندك عقل ناضج جدا

ربنا يوفقك وتحققي كل اللي تتمنيه

تحياتي
محمد

klmat said...

منى الحبيبه
اجابات جميله لشخصيه رائعه
ماشاء الله عليكى
ربنا يحقق كل احلامك وتبقى حقيقه
ويوعدك بمن يشاركك حياتك وتكون كلها
رضا وحب وود يااااااارب
خالص حبى وتقديرى

Dr. Ibrahim said...

تاج حلو بس للأسف مش هعرف أجاوبة انا لسه مخلصتش من تاج سلوى باشا


د/هيما

دكتور كسلان said...

اول زيارة لمدونتك
مدونة جميلة ما شاء الله

واضح انك بتحبى التاجات
اجاباتك جميلة وعجبتنى اوى
ربنا يزيدك ايمان ورجاحة عقل

سلاااااااااااااااااااااام

أحمد بكر said...

ما شاء الله على تجاتك
عقبالى
تحياتى

منى said...

سلوى
ايوه يا ستى 3
وكمان لسه اتنين متاخرين

ربنا يخليكى يا سلوى

ويكون فى عونا احنا الاتنين الايام الجايه دى
والله مش عارفه هعمل ايه؟
ادعيلى يا سلوى وانا هدعيلك

منى said...

almasry
ايوه يا سيدى جاوبت؟
عرفت بقى انى مش برجع فى كلامى

ومش انت قلت اختار لجمهوريه نفسى من اصحابى وافراد عيلتى
ولا عايزنى اجيب حد من بره يتحكم فيه
ايوه يا سيدى رباطيه
ههههههههههه
تحياتى

منى said...

حبيبتىmonaliza
انتى اللى جميله
ربنا يسمع منك
ويسعدك انتى كمان
تحياتى وحبى

منى said...

blue_wave
معظم الاسئله كانت خياليه فخلينى احلم باللى بتمناه
ملحوظه
تعرف لما قريت عن المدينه الفاضله بتاعه افلاطون اكتشفت انها مش فاضله ولا حاجه
تحياتى

منى said...

سنووايت
ربنا يكرمك على ذوقك وحسن ظنك
انا بصراحه بتكسف كل شويه انزل تاج
قلت اجمعهم مره واحده
مش احسن برضه
تحياتى يا جميله

منى said...

خبيب
خد بالك الدوله اللى فيها قرايبى دى جمهوريه نفسى
فمش ينفع اجيب حد غريب

مرسيى ليك
تحياتى

منى said...

الفارس الملثم
لا لا لا
مش نسيت تاجك
اقولك بس مش تضحك عليه
لسه متعلمتش انزل الصور
هههههههه
وان شاء الله اتعلم واجاوبه رغم انك باعت هولى دور تانى خد بالك

شكرا لحسن ظنك
تحياتى

منى said...

klmatحبيبتى
اد ايه ببقى فرحانه بوجودك
ودايما كلامك بيسعدنى
ربنا يجزيك كل خير على حسن ظنك
واسعادى بكلماتك
تحياتى وحبى

منى said...

dr_heam
لا ان شاء الله تجاوب
حته فى التلاجه لحد ما تفضى
ما انا لسه مطلعاهم من الفريرز
ومش جرى لهم حاجه
تحياتى

منى said...

دكتور كسلان
الحمد لله ان المدونه عجبتك
بالنسبه للتاجات
مش حكايه بحبها
بس مقدرش الاقى حد بيهدى لى حاجه واقول لاء
مش كده ولا ايه؟
يعنى انا دلوقتى باهديك التاجات دى
ها
لما اشوفك هتكسفنى ولا لاء
تحياتى

منى said...

baker
التاجات دول بقوا بتوعك من دلوقتى
اتفضل خدهم وانا جايه اشوف الاجابات
ماشى
تحياتى

مدحت محمد said...

جمع تلت تاجات وتكسب عربية هدية ههههههههه

طبعا بشكرك على قبولك التاج
الاول

بس لما تبقى رئيس جمهورية متنسيناش بقى

ماشى هههههههه

ياللا ربنا يحققلك كل امالك واحلامك يارب

Mona Shereif said...

بجد انتى جميله اوى يا منى
ربنا ينولك كل اللى فى بالك يارب
ويكون كل الخير اللهم امين
وتصدقى بالله انا لسه مش امتحنت
لسه شهر على امتحاناتى وكمان شهر الامتحانات
انا مكنتش اعرف ان السنه دى صعبة اوى كده
بس هانت اهى فات الكتير ومبقاش الا القليل

دعواتك يا قمر
ربنا ما يحرمنى منك يارب

L.G. said...

يا أم عمر
أبوه أحسن ما انتي عمالة تبعتري تاجات
طبعا سنووايت بما انها بيضا
قالت عليكي بيضا خلي بالك يا بيضىة لتتسلقي ولا تتقلي وانتي قاعدة تكتبي تاجات بس
وايه الجمهورية المحلي دي ماما وخالتي طب والمدونين عيب اديني وزارة:)
انبسطت لما قلتي عايزة المدونين جنبك من زمان
اه على فكرة التاج بتاعك صفيح بترميه خليه ألماظ وتديه لكل واحد في ايده مينفعش الكلام ده يا سلوى شوفي الحكاية دي

ربنا يبعد عنك الافكار الوحشة وتفضلي كده أحلامك طيبة
وأصلا يخليلك القدرة على الحلم والتمنى ومين يعلم يمكن بقوة دعاءك ربنا يحقق

"النجم القادم" said...

الف شكر على اجابتك للتاج

وادعيلى

هبدأ امتحاناتى غداً الآثنين دعوااااااااااتكم http://ewaatekhaf.blogspot.com/

فقط وحصريا مع النجم القادم مدونة إوعى تخاف

ابو العربى said...

اول تاج زعلت فيه انك مؤولتيش تيجى بورسعيد وبعدين مقولتيش هقطع علقتنا بالكيان الصهيونى اول ما تبقى رئيسه
اما التاج الثانى بجد انتى رائعه وزات قلب طيب قل وجوده هذه الايام
ربنا يحقق كل احلامك يارب
تحياتى
ابوالعربى

Dr. Ibrahim said...

خلاص هاخد التاج

وهجاوب عليه بس مش الوقتى ماشى


ربنا يستر على التهييس اللى هيبقى فيه


د/هيما

رحــــيـل said...

يااااه يامنى ياطوله نفسك تلات تاجات مره واحده هههههههههههههه

بس تعرفى انتى هتبقى رئيسه جمهوريه تمام
ربنا يحققلك كل اللى بتتمنيه وتحلمى بيه يارب

تحياتى لكى وحبى

(احمد سكر ) said...

معقوله يامنى

لاء المفروض كل تاج

يكون بوست لوحده

ماشاء الله عليكى

احلامك

كلامك

امانيك

يارب ربنا يحققهالك

تحياتى اختى الجميله

اخيكى

احمد سكر

.:.-=- ELGaZaLy-=-.:. said...

السلام عليكم ورحمة الله وبركاته

حلوة اوى اجباتك يا منى بجد...

وكل تاج ينفع بوست لوحدة

كوارث said...

ما شاء الله
ردودك جميلة ..
معتقدش اني هرد بصراحه !

secret-love said...

السلام عليكم
ايه الاجابات الجميله اللى كلها رزانه وعقل ربنا يوفقك دايما فى كل حياتك
تحياتى ليكى

الراقـــص مع الذئـــــاب said...

السلام عليكم
ايه كمية التاجيات ديه
الله يكون في عونك

ردودك جميلة ...كعادتك يا اختي الكريمة

جزاكي الله خيرا علي دوام السؤال عني

shaimaa samir said...

منى وحشانى جدااااااااااا
جتلك بس مكونتش داخلة باسمى
لقيت ميتفعشى اعلق
خرجت وكنت زعلانة
بعد ما كتبت التعليق
واول والله ما جيت من الامتحان النهاردة حالا اهو
دخلت على عندك
وحشتينى جدا ايتها الرقيقة
وجئت ووجدت كلماتك التى لم افاجا بها
لانك بحق هكذا
اعزك الله
وجعل تلك النوايا فى ميزان حسناتك
احبك فى الله

son's egypt said...

السلام عليكم
الواحد يجي له تاج مش اكتر من تاج
ربنا يكون في عونك
بس بصراحة ردود مرتبة ومنطقية جدا
خاصة في ردك علي سؤال الرؤساء اللي مكن تقطعي علاقتك معاهم
لان الواحد مينفعيش يعيش منعزل عن العالم
تحياتي

منى said...

مدحت محمد
طيب فين العربيه؟
هههههه
لا شكر على تاج يا سيدى
وطبعا لما ابقى رئيسه مش هفتكركم
هو انا هبقى فاضيه وادينى بقول الصراحه اهو من دلوقتى
هههههههه
ربنا يسمع منك ويحقق لنا جميعا اللى فيه الخير ويرضى ربنا
تحياتى

منى said...

sometimes
ازيك يا حبيبتى
يا رب تكونى بخير
وانا اللى كل ما ادخل مالقيش عندك جديد اطمن نفسى واقول ا اكيد بتمتحن

ربنا يوفقك ويعدى السنه على خير واحسن مما تتوقعى كمان
ودايما تنورينى وتنورى مدونتك
تحياتى وحبى

منى said...

lg
انتى فين يا بنتى ولا مره افتح الايميل الاقيكى
انتى عطيانى ايميل اونطه ولا ايه؟
ماشى يا ستى انا مش بيضه بس خدى بالك سنووايت قالت بيضه من جوه
انا المفروض كنت اديكى وزاره التنميه المحليه بس المشكله انها مكانتش فى التاج
ياله التاج الجاى بقى

لاء انا تاجى مش صفيح وهو يعنى الالماظ يغلى عليكم
هعمولك تاج عموله واجيبه بس تجاوبى بضمير
مرسيى يا ستى على الدعوتين الحلوين دول ربنا يسمع منك ويرجعلك القدره على الحلم
تحياتى وحبى

منى said...

whispers just for anight
يارب نكون قدرنا نعمل حاجه
وربما يجزيك كل خير على مجهودك وحماسك
تحياتى

منى said...

النجم القادم
ربنا ينجحك ويوفقك
شكلك كده هتنزل لنا الجدول عشان ندعى لكل ماده على حده
ههههههه
ربنا يسهل وتعدى الامتحانات على خير
وينجح الجميع
تحياتى

منى said...

ضد الظلم
لاء مفيش زعل ان شاء الله
بس فيه اولويات
فى بلاد مسمعتش ان اى مسئول زارها اساسا
لكن بورسعيد ماشاء الله اشهر من نار على علم وبعدين انا زرتها فعلا قبل كده
اما عن قطع العلاقات الدبلوماسيه انا قلت فى الحالات القصوى وهى دى مش حاله قصوى؟
وشكرا على حسن ظنك
تحياتى

منى said...

dr_hema
مرسيى جدا انك قبلت التاج
وجاوب براحتك خالص وفى الوقت اللى يعجبك
المهم انك تجاوب
تحياتى

منى said...

ra7eel
بتضحكى
والله بجد تعبت وخصوصا انى مش ببقى مجهزه اجابات وبقول اللى بيجى فى بالى
بس قلت ادارى الاجابات فى زحمه التاجات
ههههههه
تحياتى يا قمر

منى said...

سكر
ربنا يخليكى ويكرمك
على كلامك الجميل ده
انا قلت بقى بدل ما كل يوم ازهقكم بتاج مره واحده بقى وخلاص
شكرا لحسن ظنك
تحياتى

منى said...

elgazaly
وعليكم السلام ورحمه الله وبركاته
مرسيى جدا
هو فعلا طويل بس قلت اخلص ديونى مره واحده
تحياتى

منى said...

كوارث
ليه مش هترد بصراحه؟
هى احلامك غريبه ولا جيله وخايف مش نصدق
جاوب انتى بس واحنا اللى نحكم
تحياتى

منى said...

secret_love
حمد الله على السلامه
ياترى عملت ايه فى الامتحانات؟
شكرا ليك
وربنا يسمع منك
تحياتى

منى said...

الراقص مع الذئاب
وعليكم السلام ورحمه الله وبركاته
حمد الله على السلامه
يارب تكون بخير
وبعدين لاشكر على واجب ده حقك علينا
تحياتى

منى said...

shaimaa samir
يا حبيبتى
يااااه
فاكرانى وانتى جايه من الامتحان وجايه عليه على طول
ربنا ميحرمنيش منك
مش هقدر اسامح نفسى انك جيتى ورجعتى زعلانه ان شاء الله لازم اتصرف النهارده وافتح التعليقات للغير معرف عشان تيجى فى اى وقت تلاقى الباب مفتوح
والله يا شيماء انتى مش عارفه تعليقك ده عمل ايه فيه
ربنا يجمعنا دايما على الخير
والله حاسه انى هعيط
يلا سلام بقى
تحياتى وحبى

منى said...

sons of egypt
مرسيى جدا
ياريت نشوف اجاباتك قريب
تحياتى

دعاء مواجهات said...

إجاباتك حلوة اوى وبتدل على شخصية

متميزة وصافية بجد من داخلها

تحيااتى ليكى ياقمر



انتظرك بمدونتى

عـــفـــراء said...

السلام عليكم ورحمة الله وبركاتة
حقق الله لكى كل ماتردين وجمعنا واياكى بجنة الخلد ان شاء الله
دمتى فى رعاية الله وحفظة

Anonymous said...

منى

السلام عليكم

دى اول مرة ازورك وان شاء الله مش هتكون الاخيرة

المهم

تاجاتك كتيرة ربنا يكتر اكتر واكتر

اجاباتك هايلة

احسن اجابة

هدفك ايه من الحياة
ادخل الجنة

مش هتكلم كتير عليها

غير يارب ادخلنا الجنه جميعا

والبوست اللى بيتكلم عن حب الخالق

جميل فعلا

ادام الله عليك نعمه

تحياتى

والى لقاء

المستنصر بالله said...

اجاباتك كلها جميله قوى
بس اثر فيا قوى اجاباتك هنا

3اتمنيت لو اتجوزت فى الدنيا اتجوز معاق من اصحاب الحالات القاسيه اللى صعب يلاقوا فرصه للزواج مش شفقه واحسان

بجد دى اخلاق عاليه جدا
ربنا يبارك فى حضرتك

رفقة عمر said...

منى اجاباتك رقيقه وجميله زيك
مع اانى مش بتابع مدونات قوى اليومين دول
بس حبيت اطمن عليكى واسلم عليكى
ربنا يوفقك لما يحبه ويرضاه اللهم امين

Anonymous said...

لا يا منى
لازم تسمعيه
هتسشعريه اكتر

الاول ازييك وحشانى
ادعيلى عندى امتحان بكرة
زهقققققققققتتتتت خالص

منى said...

دعاء مواجهات
مرسيى لذوقك ورايك الجميل اتمنى اكون عند حسن ظنك
ويشرفنى انى ازور مدونتك
تحياتى

منى said...

عفراء
وعليكم السلام ورحمه الله وبركاته
ربنا يتقبل منك
ويجزيك كل خير
تحياتى

منى said...

عرفه فاروق
وعليكم السلام ورحمه الله وبركاته
اشكرك جدا على حسن ظنك
ربنا يوعدنا جميعا بالفردوس الاعلى
وطبعا يشرفنى وجودك دايماا
تحياتى

منى said...

المستنصر بالله
ربنا يبارك فيك
ويجزيك كل خير
تحياتى

منى said...

رفقه العمر الجميله
يعنى جايه لى مخصوص؟
ربنا يكرمك ويجبر بخاطرك
انتى متعرفيش بفرح بوجودك اد ايه؟
ولسه كنت فى سيرتك مع صاحبتى
ربنا يبارك فيكى وتنورينى دايما
تحياتى وحبى

منى said...

شيماء سمير

ان شاء الله هسمعه تانى
ربنا يوفقك يا شيماءوتعدى الامتحانات على خير
ويارب تكون عنيكى احسن دلوقتى
تحياتى وحبى

Unknown said...

السلام عليكم ازيك يا بلدياتي
ايوه كده الواحد حاسس ان له ضهر وسند
هههههههه
المنصوره اجدع ناس

جميل اوي التاجات دي وشخصيتك حريريه بجد
تحياتي ليكي

ونورتيني يا عسل

ammola said...

حلمك الخاص بالزواج من معاق فوق الوصف
ورجوعك عن الحلم برضة فوق الوصف
منتهى الرقة والاحاسيس
ربنا يحقق لك احلامك ويسعدك

منى said...

bar2ash
وعليكم السلام ورحمه الله وبركاته
انت مكنتش تعرف
دى الجاليه الدقهلويه من اكبر الجاليات فى بلوجر
هههههه
مرسيى جدا تحياتى

منى said...

ammola
انتى اللى فرحتى بوجودك بتبقى فوق الوصف
ربنا مش يحرمنى منك ومن كلامك الجميل
تحياتى وحبى