Sunday, November 11, 2007

طيور من غير جناح

بحلم كتير ان الطيور بقت تطير
من غير جناح من غير صفير
بس بجراح وفؤاد كسير
قابلت يوم طائر ضرير
وقلت فين راحت عينيك
قالى وليه عايز عينين
الحق ساطع والعدل ضايع
والقلب شايل مالخوف كتير
عايز عينين اشوف جناحاتى مكسورين
ولا غنايا ممكن يهون ع المظلومين
لون الغيام ده مش سحاب ولا مطر
ده قلب امى اللى انفطر
لما سمع صراخ صغير بيموت وحيد وسط الدمار
والشمس نارها دى غضب
لكن حبساه فى قلبها زى قلوب كل البشر
والروض ده نار
دى كل نابته خارجه من قلب اتخنق
ومات معاه حلم صغير كان لسه بيتولد
الروض ده نار
لكن عيون بنى البشرشايفينه جنه
وشايفين الامل
طيور
من غير جناح

31 comments:

رفقة عمر said...

ماشاء الله دة كلامك
بجد جميل قوى واثر فيا
ربنا يوفقك يارب
اللهم امين يارب العالمين
احساسك عالى قوى

محمد جمعه said...

بسم الله أسلوب شيق

جزيت الجنه

محمد جمعه said...

بسم الله أسلوب شيق

جزيت الجنه

منى said...

رفقه عمر
امين يا رب يوفقنا جميعا لما يحب ويرضى
نورتينى يا رفقه ويا رب متكنش اخر زياره

منى said...

محمد جمعه
امين يا رب جماعه ان شاء الله

Anonymous said...

بجد روعه وكل بوست منك بيعلى كتير عن التانى وربنا يوفقك ان شاء الله وللامام دائما

الطائر الحزين said...

الامل هو الطير من غير جناح يريد أن يطير حتى ولو كان ضرير نفسة يشعر حرارة الشمس بس المهم يطير يطير بلا وجهه بس المهم يطير

لكن اتخنق واتعمى ويبحث عن سبيل

جميلة تسلم ايدك

مدحت محمد said...

الله بجد
بجد بجد بجد رائع
بصى مش هتكلم كتير عشان متقوليش بنافق
انتى موهوبة بجد

عصفور المدينة said...

هو ضرير ومن غير جناح
ولكن قلبه ينبض بالأمل والحق

حيا الله قلمك الرائع

حقى اهرتل said...

انا كنت من غير الصحاب صاحب قلق
وكنت عايش ف الحياه ع المفترق
مين اللى قال انك هتقدر تنتفض
من غير ما حد يشد ايدك م الغرق

منى said...

سيدى الرئيس
اشكرك بشده
ربنا يجبر بخاطرك

منى said...

الطائر الحزين
تسلم انت اخى
انا احب ان كل واحد يتخيل اللى هو عاوزه يشوف البوست زى ماهو عايز

تحياتى لك

منى said...

doha
مرسيي جدا
مش عارفه ليه يا دوحه بتفكرنى باخويا الصغير؟
مش صغير قوى يعنى هو قدك تقريبا

منى said...

عصفور المدينه
حياك الله سيدى
مرورك دوما يسعدنى

منى said...

حقى اهرتل
حقك طبعا
اهلا بوجودك المتميز
انا اساسا من عشاق الرباعيات
واختيارك فعلا موفق
تقبل شكرى

سلوى said...

جميله جدا يا لولو بجد

ولها فكرة جامده

أحسنتي

تحيااااتي

منى said...

ازيك يا لولو
منوره والله

ammola said...

والله معاكى حق تسمى مدونتك احاسيس
تتصورى انا مكونة عنك صورة خيالية وانتى كل بوست بتاكدى لى صحة تصورى
مش حاقولك ايه الصورة علشان ما تتغريش
:)
يكفى انى والله باحس براحة وشاعرية لما بادخل مدونتك

مجلة سيكولوجية مصرية said...

سعدت جدا باكتشاف مدونتك

بحلم كتير بحاجات اكتر

بحلم بحتة سكر

وبال رايق ومش متعكر

تحياتى لك وارجو ان نتواصل

أحمد مصطفى

منى said...

اموله
ايه ده؟الكلام الحلو ده ليه انا؟
ربنا يكرمك يا اموله
بس اسمحيلى اتغر شويه

منى said...

احمد مصطفى
سعدت بزيارتك
وربنا يحققلك احلامك

zordeak said...

جميل احساسك

:)

Soooo said...

روحي ياشيخه ربنا يارب يكرمك ويكرمنا بدخول الجنه عالكلام الحلو اللي قلتيه في الموضوع ده

بجد والله اسلوب هايل واختيار موفق وقدره راااائعه على تطويع الكلام لخدمة الموضوع والتعبير باحساس وصل لكل اللي يقراه

بجد بجد بجد .. ربنا يكرمك يااااااارب
ويارب نجتمع في الجنه في حضرة نبينا محمد عليه الصلاة والسلام


سلامووووووووووز

منى said...

zordeak
اهلا بك اخى
وشكرا على التعليق

منى said...

سوووووووو
امين يا رب يسمع منك ربنا
بس ايه الكلام الجميل ده
اخجلتم تواضوعنا

truelove said...

كلمات في الجون واسلوب ممتع وواقعي وفعلا ما فائدة العين اذا ما اعتادت على رؤية كل ماهو مؤلم فقط تقبلي مروري ياقمرية

عليوه said...

بجد كلام جميل واحلى حاجه فيه انه سهل انا اصلى مش بحب الكلام المجعلص الكبير ولما بخش اى بوست الاقيه كده مش بكمله لما الكلام بيكون سهل بيوصل للقلب بجد انا استمتعت بكلامك وطريقه كتابتك جدا

منى said...

true love
اهلا بكى وبوجدك الجميل
وابقى خلينا نشوفك دايما

منى said...

عليوه
ربنا يكرمك يا رب
ويعجبك دايما كل اللى اكتبه

السينيور said...

الحق ساطع والعدل ضايع
والقلب شايل مالخوف كتير
عايز عينين اشوف جناحاتى مكسورين
ولا غنايا ممكن يهون ع المظلومين
لون الغيام ده مش سحاب ولا مطر
ده قلب امى اللى انفطر


حاسسها اوي

تسلم ايدك يا منى

منى said...

ربنا يسلمك من كل شر اخى المفروس
منور والله