دردشه سريعه

السلام عليكم ورحمه الله وبركاته

يوم 23 اكتوبر كان نفسى اوى اكتب موضوع جديد بمناسبه مرور عامين على وجود احاسيس فى الدنيا بس ربنا ما اردش وبصراحه نادرااا جدا لما بدخل نت وكمان فترات قليله اطمن على الناس بسرعه ومش بلحق اعلق كمان

وفات كام يوم وفجاه دخلت لقيت تعليقات بايخه هى صحيح مالهاش علاقه بيه غير وجودها هنا فى مدونتى لكن بصراحه زعلت اوى عارفين احساس لما تسيب ابنك فى الشارع وتدخل تنام وتقوم تلاقى حد من الشارع ضربه وعوره ويقولك انا كنت بنده عليكى يا ماما وانتى مردتيش كده يا ماما تسيبيه يضربنى؟ انا حسيت كده .مش عارفه ليه افتكرت كمان حاجه دايما بفكر فيها انى لما اموت مش هقدر ابعد اى حاجه عن نفسى مش هقدر اقول للمغسله بالراحه الله يكرمك ، ولا ارد على اللى يقول على لسانى اللى مقولتوش

كمان مش هقدر امسح اى تعليق وحش من مدونتى عشان كده كنت بفكر ادى باسورد المدونه لاتنين من صديقاتى ولو انا مش قادره فى اى وقت ادخل المدونه لاى سبب كان هما بقى يراعوها او يقفلوها بصراحه حاولت انا اقفلها لانى مش قادره اراعيها واديها حقها بس مهانتش عليا دى بنتى يا ناس حتى لو حد شافها دمها تقيل برضه بحبها مش بيقولوا القرد فى عين امه غزال وهى يعنى مش قرد اوى هههههههه اعتقد يعنى

الناس اللى نسيونى عندهم حق والله انا عذراهم بس ياريت ميكنش حد زعلان منى

عايزه اسيبكم مع حاجه قراتها قريب وعجبتنى اوى

الهى قد تحاببنا ومنك الحب والعهد

فنرجو فوقنا ظلا يوم الحر يشتد

لنا ولاهلنا عفوا.ومنك العفو يمتد

ومغفره ونزله جنان ما لها حد