Saturday, March 15, 2008

اعطنى مهاره وارمنى فى بحر البطاله


بعد الثانويه العامه،كان لابد من التفكير فى كليه معينه
لذا قررت ان اقرأ كل ما احب خارج الجامعه واتخصص فيما يساعدنى فى حياتى العمليه
وكانت كليه التربيه هى الكليه الادبيه الوحيده التى يتم تكليف خريجيها فدخلتها ووجدت ان قسم اللغه الانجليزيه هو الافضل لانى لو لم يتم تعيينى استطيع ان استخدم هذه اللغه فى اشياء اخرى وهو ما حدث بالفعل والحمد لله ولن احكى كم عانيت من المواصلات والزحام فى كل مكان بالكليه من مدرج ومسجد وشئون الطلبه و و و والله احيانا كنت ابكى
وبعد اربع سنوات كامله
ماذا جرى؟
اخدت شهاده
يا فرحتى
التكليف اتلغى
مش مشكله فيه مسابقه قدمى فيها يا منى
اول مسابقه كانت للدفعات اللى قبلى بس تابعتها من باب الفضول
ويوم النتيجه سمعت صوت واحده جارتى بنتها كانت مقدمه فى المسابقه لقيت صوتها عالى فى الشارع
بتقول
لقيت ولد يا عين امه بيعيط وحالته صعبه
سالته مالك ؟
قالى انا خريج هندسه وعينونى ساعى وقعد يصرخ
مش عارفه انا قعدت اعيط يومها قد ايه وحسيت انى انا اللى اتهنت مش هو
طبعا مقصدش اهين الساعى ،لكن الشاب ده كان له حلم تانى خالص اتحمل عشانه دراسه صعبه ومصاريف اكيد ارهقته هو وعيلته
ساعتها بس قررت مستناش حاجه من حد لا وظيفه من الحكومه ولا حتى منحه من بابا
انا الحمد لله ربنا ساعدنى وحصلت على شغل مناسب وبسرعه
مع انى لسه مش راضيه عن نفسى
لكن
يا ترى كام واحد لقى شغل يناسبه؟

او حتى لقى شغل وخلاص؟
كانوا بيقولوا الشهاده سلاح دلوقتى الشهاده برواز
يمكن يكون كلامى صادم وحاد لكن مواجهه الحقيقه ممكن يساعدنا علىالمقاومه لكن الهروب منها مش هيفيد باى شكل
سلاحك دلوقتى هو مهاره تمكنك من مواجهه الحياه
مثال حرفه موهبه رياضه اى حاجه
هتقولى يعنى بعد كام سنه تعليم وشهاده عاليه ابقى حرفى
هقولك لو عندك فرصه تانى خلاص
هتقولى يبقى البلد كلها حرفيين
ه
قولك ماهى الاماكن اللى هتاخدك بشهادك محدوده وااديك شايف حواليك بيقولوا مش محتجينك
هتقولى بعد ما شاب ودوه الكتاب
هقولك هو ده بقى الموضوع
صعب قوى اجيب واحد عنده 21 سنه واقوله انسى كل اللى اتعلمته وتعالى اعلمك حاجه تاكل منها عيش
الحل من وجه نظرى المحدوده فى يد الاهل
نمى موهبه ابنك من صغره
اللى بيعرف يرسم هاتله منشار اركيت ،علمه ارابيسك يعمل براويز لوح وساعات حائط على ما يتخرج يبقى عنده محل كبير جايز يوصل لمصنع،ليه لاء؟
موهوب فى رياضه معينه شجعه وخليك معاه للاخر
مشغول بالكمبيوتر
خليه يتعلم فيه على اد ما يقدر
مالوش فى اى حاجه شوف كده صنايعى محترم جارك او قريبك يخده معاه فى الاجازه
طبعا كل اللى بقوله ده بجانب الدراسه لان صدقونى مهما كان نظام التعليم سئ بس بيفرق كتير متعلم او لاء ولو قلت ليه يبقى بوست تانى
المهم
اديكم مثال
واحده زميلتى كان اخوها الصغير طالب ازهرى وكل اجازه بيشتغل مع واحد نجار وهو كان موهوب جدا على ما خلص جامعه كان حوش مبلغ محترم وبقى ليه زباين ودلوقتى عنده ورشه كبيره ومعرض راقى بيجيله زباين من المحافظات اللى جنبنا
مثال تانى
مدرس تربيه فنيه كان عندنا فى الثانوى
وطبعا المرتب مش هيقضى مصاريف شاب زيه عايز يخطب ويجيب شبكه ويجهز ويتجوز
كان بيعمل لوح وساعات حائط ويبيعها وكان بيعلم البنات كمان يعملوا الحاجات دى ويبعها
لهم
وبعد كده عرفت ان عنده محل جميل بيبيع فيه شغله وبيوفر له دخل محترم
الامثله كتير بس مش عاوزه اطول عليكم
على فكره كلامى من واقع حياتى فى مدينه صغيره جنب المنصوره ،ومعرفش ان كان مناسب للمدن الكبيره ولا لاء
بس بحاول افكر معاكم بخط عالى
بحس بقهر فظيع لما الاقى واحد ولا واحده من زمايلى بيشتغل فى حاجه مش مناسبه خالص
واعتقد ان اى شغله بسيطه بس بتاعتك انت تكسب فيها على اد ما تتعب احسن بكتير من الانتظار والاكتئاب
يمكن اكون غلطانه او على حق؟
المهم نفكر ازاى نخرج من ازمتنا






95 comments:

ammola said...

لا طبعا مش غلطانة
كلامك كله صح
ولازم احنا كمان نبدأنغير نظرتنا للحرفى المتعلم-مش شرط شهادة جامعية-بس ما يكونش أمى وجاهل
انبياء الله كلهم كانوا بمفهوم عصرنا حرفيين..ومع كده علموا الدنيا كلها اسمى رسالة وهى التوحيد
كمان انا شايفة اننا لازم نغير نظرتنا لاى مهنة مهما كانت بسيطة مادام صاحبها متعلم مش لازم يبقى المجتمع كله حملة شهادات عليا وعواطلية وعالة على اهلهم المهم ان زى ما الشهادة حاجة مهمة برضة العمل مهما كان بسيط بيجيب لصاحبه الاحترام

الراقـــص مع الذئـــــاب said...

السلام عليكم
ازيك يا مني
اولا الموضوع في منتهي الروعة
وخلاني ارجع بالزاكرة لحاجة صعبة اوي

سؤال لو إتسألته مش هعرف اجاوب عليه للأسف

هو انا بشتغل ايه؟؟؟

انا خريج كلية هندسة قسم إتصالات والكترونيات....هندسة (مش ) بفلوس
يعني كنت بزاكر في الثانوية العامة وكنت من الاوائل للأسف
طبعا مع احترامي للهندسة ام فلوس وللناس اللي متخرجين منها

ودلوقتي انا ضابط في الجيش...وكل معلوماتي عن الهندسة وتخصصي زي معلومات اي بائع جرائد عن عملية الايض في الكائنات الحية

حاجة محبطة اوي...مش كدا؟؟
بس احنا بقي غلبنا اللي احنا فيه بحاجة جميلة
بدانا نزاكر كورسات ونعمل اب ديت لنفسنا في خلال الوقت الفاضي
والحمد لله بدانا نرجع تاني للمجال بتعنا

علي فكرة دي حملة مواضيع هتبقي في المدونة عندي إن شاء الله
بس انتي بقي ليكي السبق عشان اتكلمتي فيها قبلي

جزاكي الله خيرا علي الموضوع الجميل والمبادرة المفيدة

AHMED SAMIR said...

هندسة وعينوه ساعي؟
ياللهووووووووووووووول
هي بقت كدة؟

ammar said...

هو كلام ممكن يكون مقنع شوية
بس احنا كشباب لينا احلام وطموحات
وانا اقرب مثال
معايا صيانة موبايل
شغلانه بتجيب فلوس قد كده
بس مش املى ان اشتغل بتاع صيانه
واقعد ماسك مكوة ومفك
طيب ليه كنت باتعلم ؟
هو انا صحيح مش لاقى جواب للسؤال ده
بش هاخليها على ربنا لما ابقى اتخرج
بوست جميل
ربنا يوفقك

الطائر الحزين said...

صعب ان تتم هذه الفكرة لان هذا محتاج الى انقلاب فى فكر المجتمع


يعن لو واحدة تقدم لها واحد بيشتغل سباك هتقبل تتزوجة


الامر محتاج الى تغيير الفاهيم واعادة بث قيم جديدة فى المجتمع ولابد ان نعى جميعا ان الحكومة تركتنا لبعضنا

يعنى اللى عاوز يتعالج يروح لدكتور واللى عاوز يتعلم يروح لمدرسة خصوصى


مؤسسات الدولة لم يعد لها دور


تحياتى

منى said...

ammola
بتقولى صح؟
طبعا وانتى تقدرى تقولى غير كده
بس اقولك الحق انتى تكسبى
اللى قلته فى بوست طويل عريض انتى جبتى خلاصته فى تعليقك
اموووووووله يا ناس

منى said...

الراقص مع الذئاب
وعليكم السلام ورحمه الله وبركاته
اولا ربنا يجبر بخاطرك
ثانيا تجربتك دىافضل مثال للموضوع
يعنى انت عملت اللى عليك فى الدراسه
ولما لقيت الانسب الجيش غيرت اتجاهك زى ما فهمت
وكمان بتحاول تعلم نفسك من جديد
ما شاء الله عليك
ربنا يوفقك ويكرمك
على فكره الموضوع ده كتبته من فتره بس كنت مكسله انزله
لكن يمكن زى ما قلت هو بدايه
وان شاء الله نستفيد اكتر منك
تحياتى

منى said...

a.samir
اه
واكتر من كده كمان
تحياتى

منى said...

ammar
كنا محتاجين التعليق ده
وجه نظر اللى معاه المهاره بس عايز يشتغل فى مجال دراسته
عندك حق طبعا
بس ظروفنا وظروف بلدنا بتخلينا نتنازل كتير عن احلامنا
وده مش سهل ابدا هو زى ما تقول كده
قضى اخف من قضى
وبما انك لسه بتدرس
بتمنى لما تخلص تشتغل فى اللى بتحبه وربنا يوفقك
تحياتى

منى said...
This comment has been removed by the author.
منى said...

الطائر الحزين
عندك حق
لكن التغيير مش هيبدا الا بينا
واعتبر البوست ده الخطوه الاولى
تحياتى

Unknown said...

عاوزه اقولك انا دلوقتي بشتغل بالرغم من ان سني 17 سنه و مش محتاجه للماده بس محتاجه لبعض الاستقلال المادي والاعتماد علي النفس

و الفكرة تنفع
انا مجالي مجال البرمجيات والكومبيوتر و بالرغم كده بشتغل ف مجال التنميه البشريه

عموما البوست رااااااااااائع
جدا

ميس دوت
نحو التغيير العملي

WhItE HeArT said...

السلام عليكم

احييكي على الموضوع الجميل ده ......

قالى انا خريج هندسه وعينونى ساعى وقعد يصرخ


هيه دي اللي اثرت فيا بصراحه لإني تخيلت اني اهو بعد سنتين بس في هندسة لو حصل ده معايا ممكن يحصل لي ايه فما بالك هوه خلص وخد شهادته

عموما معاكي ان احنا ممكن نعلم اي حد صغير حاجة لكن انا مش معاكي اني انا مثلا دلوقتي ممكن اتعلم حرفه معينه غير تخصصي اللي انا فيه ده مستحيل بالنسبالي

الظريف في الموضوع ان الناس دلوقتي مبقاش يهمها مين شغال ايه المهم مين بيحيب كام وده شيء غير آدمي بالمرة لما
الشحات دلوقتي بأه بيحوش اكتر من دكتور الجامعه ودي حاجة مش طبيعيه


الموضوع جميل ياما اتكلمنا فيه بس قوليلي حل لواحد في سني او سنك يعمل ايه بأه ومتقوليليش انه يتعلم سنعه ده شيء محال

تحياتي

موناليزا said...

انا معاكى طبعا فى كل كلامك بس المشكلة يامنمونة ان فيه ناس معندهمش مواهب اصلا او عندهم ومش عارفينها ده غير كمان ثقافة المجتمع وانا عايزة اتجوز ظابط هههه
يعنى نظرة المجتمع لو اتغيرت كل حاجة هتتظبط ده غير طبعا الاحباط اللى الشباب هيبقى فيه لما يعرف ان اخر تعبه ومذاكرته عشان يعلق الشهادة ع الحيطة
احييكى على طرح هذا الموضوع فهو يحتاج مناقشة ودراسة

إنسان || Human said...

هي وجهة نظر كويسه...بس برده أنا مختلف معاكي
إحنا عارفين إن التعليم سيئ جداً ولايؤهل إلى أي شئ
إذن لو مثلاً طالب في تربية إنجليزي
ماينفعش يعتمد فقط على الكلية في تحسين لغته ودراسته حتى لو أستعان بخارج الكلية
صدقيني إنت عارفه لوده سافر أو أتاحت له الفرصه في بلده ..أو في أي مكان هايثبت نفسه صح ..ليه لأنه دراسه +تفوق في مجاله
هيساوي إنسان كويس لأنه تعب
لكن شوفي الدفعه فيها كام واحد
المتميز هو اللي بيثبت نفسه
مش شرط تقدير على فكره,,,بس هو مهم جداً
...
ألاف الطلاب بيتخرجوا من تربية وطب وهندسه وتجاره
اللي بينجح هو اللي بيكون مختلف وحابب مجاله

بحبك يامصر said...

بوست رائع
انا معاكى اننا نحاول نعلم الصغار حرفه بجانب تعليمه ولكن المشكله فى الكبار الواحد بيكون فاكر انه خلاص خلص مرحلة التعليم وهيبدأ فى الحياه العمليه لتكوين اسره وستقل بحياته من خلال شغله ولما نيجى نقول يبدأ يتعلم من جديد هتبقى صعبه عليه اوى

هبههههووب said...

بوست هايل يا منى اهنيكى عليه
احب اقولك ان انا معاكى ف كل كلمه واحب اقولك ان الكلام دا المفروض يتطبق ف كل مكان الانسان المصرى لو اعتمد على شغلته بس دلوقتى مش هيعرف يعيش
لان الوظيفه بس مبتأكلش عيش
لازم يكون فاتح محل او عامل مشروع او او او
كل دا بيفرق معاة ف حاجات كتير
ومعاكى ف تنميه مواهب الاطفال منذ الصغر دا بيفرق معاهم ف شغلهم لأن الانسان بيكون انجح ف العمل الى هو بيحبه وبيعرف يبدع فيه اكتر لآنه حبه
بجد ميرسى كلامك جميل
تشكرات

klmat said...

عزيزتى منى
كلامك معقول جدا . انا كتبت بوست
قديم كان اسمه نفسى . من خلاله قلت نفسى
اعمل حاجه لبلدى وقدمت اقتراحات
وقلت ياريت الاهالى من بدرى يفكروا فى
كده ياخدوها على انها هوايه وفى سن
صغيره مع الدراسه واقترحت ان البنات
يتعلموا خياطه وتريكو من سن 12 سنه
حاجه تناسب سنهم وحاتتنمى معاه وعمرهاماحا تخسر . فكره نيره ياريت
ناخد بها
خالص حبى وتقديرى

رحــــيـل said...

منى

موضوع رائع فعلا
فكرتينى بمأساتى بجد
انا دخلت كليه تجاره عشان عارفه انها من البدايه الانسب ليه كنت بحب مجال الاداره جدا وكان نفسى اشتغل فى ايه وكان اكتر حاجه بكرها الشغل الحكومى والروتين وقرفه
ولفت ودرات الايام ودلوقتى بشتغل ادرايه فى معهد ازهرى ومتسالنيش ايه العلاقه
بس انا ده وضع مؤقت بالنسبالى لغايه ماانمى مهارتى وابتدى تانى ادور على شغل فى مجالى
مشكله الشباب الايامدى انهم مش عايزين يتعبوا او مش عارفين الطريق منين
لو فعلا الاهالى فكرت بالشكل اللى انتى قولتى عليه الشاب هيكبر وهو متأسس صح
وكمان يقدر يعتمد على نفسه ويكون راجل بجد

تحياتى لكى

اجري على الله said...

سلام عليكم
اول زياره ليا وشكلي كده جيت في اكتر البوستات تشائما
يالا ماعلينا بالنسبه لموضوع الراجل بتاع الهندسه ده ربنا يبشرك بالخير اصلي برده من نفس التيار الهندسي
لكن فعلا انا معاكي موضوع الشهايد ده كان زمان زماااااااان زمااااااااااااااااااااااااان
وعلى رأي عادل امام بلد بتاعة شهادات

ربنا يسترها علينا وعليكم
وفي النهايه الرزق بتاع ربنا

اتمنى ان نتواصل
الشاعر بن هلال

Rania Lelah said...

بصى حبيبتى انا خريجة اداب انجليزى
و لحد انهاردة مفيش تعيين
يعنى حتى مش كان فى تكليف و اتغلى او حتى كان فى تدريب لا دة احنا مش على البال اصلا
بس بصراحة
انا من ساعة ما اخرجت و الحمدلله مش قعدت يوم واحد فى بيتنا
اشتغلت باللغة بتعتى و الحمدلله
لازم مش نستسلم
لازم نسعى احنا بنفسنا و نشوف الى المفروض نعمله
و موضوع الوايه اكيد فكرة ممتازة
اما انا نقعد مستنين حد يخبط على بابنا و يقولنا تعالىول اشتغلوا مش نافع
المفروض عليهم اه
انما ادم محصلش يبقى نعمل احنا
و علينا بالقطاع الخاص

مودتى

walaa said...

البلد مفهاش شغل والشباب بقى بيشتغل اى حاجه علشان يقدر يجهز نفسه زى ما قلتى انا خلصت الجامعه واتجوزت علطلول وقعدت ااقول لزوجى انا هتشتغل ده حقى خريجة تربيه زيك بس لغه عربيه
رحت اتقدمت فى العقد كان ب150جنيه فقط قوليلى هيكفوا ايه ولا ايه
قلت خلينى قاعده فى البيت احسن
وقلت فى عقل بالى امال الشباب تعمل ايه وتتجوز منين
اهم يشتغلوا اى حاجه ويساعدو نفسهم هيعملوا ايه يعنى
ياما البلد دى يحصل فيها ثوره وينصلح حالها
تحياتى ولاء

مدحت محمد said...
This comment has been removed by the author.
مدحت محمد said...

والسيد المهند س وزير الزراعة
غلط يااستاذ مدحت
ليه بس ياسعادة الريس ماهو الجواب كدة صح
مش المفروض وزير الزراعة يبقى مهندس زراعى
المفروض يامدحت بس للاسف ده رجل اعمال
اكتب السيد الاستاذ وزيرالزراعه
كنت عايز اقول للمدير بتاعى
اوعى تكون انت كمان رجل اعمال
خلاص
مصر بقت طبقات
مبقاش فى عدل
انا اعرف ناس معاها بكالوريوس تجارة بتقدير جيد
واقفة فى افران عيش والله
بقالها خمس سنين متخرجة
مصر بقت دولة
طبقية
ومفيش حاجة اسمها مهارات وشهادات والكلام الفاضى ده
اللى معاه فلوس بيدوس
تحياتى

Gihad N. Sohsah said...

ربنا يستر عليييييييييييناااااااااااا

منى said...

miss dot
برافو عليكى
واو انى اعتقد ان مجالك سهل تلاقى شغل فيه
عموما اسعدنى مرورك وتجربتك ومعرفتك
تحياتى

منى said...

white heart

طبعا مينفعش اقول لواحد زيك بعد ما تخلص هندسه ابقى اتعلم سباكه مثلا
مع كل احترامى للسباك
لكن انت مثلا ممكن تشوف حاجه قريبه من تخصصك وتشتغل فيها شغل خاص اديك مثال
اعرف واحد كان خريج معهد صحى قسم صيانه اجهزه طبيه وكمان اتعين فعلا لكن كان طموح والمرتب مش كفايه
مكنش عنده مكان
كان مكتبه هو موبايله
وزعه على العيادات والمعامل
فى المحافظه كلها واللى يعوزه يتصل بيه
وهو يروح لعنده يصلح الجهاز او يخده يصلحه ويرجعه ودلوقتى ما شاء الله بقى عنده مركزصيانه كبير
وهو لسه شاب برضه

منى said...

monaliza
عندك حق طبعا

بس مفيش مفر من الاحباط لو الواحد ملقاش الشغل اللى يناسبه
بس مفيش حد معندوش منحه
يعنى لو مفيش مهاره معينه
ممكن تلاقيه بيعرف يتعامل مع الناس كويس مثلا
وفى الحاله دى ممكن يشتغل فى التجاره وينقى التجاره اللى تناسبه
كمان ممكن يعمل حاجه زى مشروع عيش الغراب
بس فعلا الموضوع محتاج دراسات كتير وتفكير اكتر
اسعدنى وجودك
تحياتى

منى said...

human
عندك حق
انا شغلى خلانى عرفت حاجات بسيطه فى اللغه معرفتهاش فى اربع سنين جامعه
بس المهم الواحد يلاقى الشغل اللى يثبت فيه تفوقه
تحياتى

منى said...

بحبك يا مصر
هى صعبه صحيح
ومؤلمه ومحبطه
لكن هنعمل ايه؟
حياتنا بقت بالمقلوب
مرورك هو الاروع
تحياتى

منى said...

هبهههههوب
ربنا ما يحرمن من عقلك وذوقك
ومرسىى خالص على الكلام الجميل
وان شاء الله هبقى اقولك على تجاربى فى مجال العمل الخاص
تحياتى

منى said...

كلمات
جميله فكرتك
تعرفى كان طول عمرى باتمنى اتعلم شغل الابره والتطريز والحاجات دى
بس محصلش نصيب
لكن لسه عندى امل
عارفه عندى اوضه فايضه فى الشغل كلمت الاداره عليها ووافقوا انها تبقى زى معرض الاسر المنتجه

ادعيلى المشروع ينجح
تحياتى يا جميل

منى said...

رحيل
جميل يا ساره عدم الاستسلام
انتى فعلا بتشتغلى
لكن لسه جواكى الحلم انك تشتغلى فى الحاجه اللى بتحبيها
وناويه تحاولى
برافو عليكى
ربنا يوفقك
تحياتى

منى said...

اجرى على الله
لاتشاؤم ولا حاجه
احنا بس بنفكر سوا على حلول
ربنا يستر ويوفقك وتلاقى شغل فى مجالك ان شاء الله
تحياتى

منى said...

رانيا
ايوه
هو ده الكلام
محدش هيخبط علينا ويقول تعالى اشتغل اللى انتى عايزه والفلوس اللى انت عايزها
لكن ندور
تعرفى انا كنت بفكر فىى الشغل وانا لسه فى الجامعه
وعملت بعض المحاولات ايامها
والحمد لله ربنا وفقنى
بس حاسه انا لسه المشوار طويل
بطول العمر

منى said...

ولاء
والله يا ولاء الشباب بيصعبوا عليه اوى
اكتر من البنات
صحيح الشغل مهم للجميع
لكن البنت لو مش عايزه تشتغل وظروفها كويسه محدش هيلومها
لكن الولد هيعمل ايه
ربنا معاهم ومعانا
تحياتى

منى said...

مدحت
والله يا مدحت المراره اللى فى حوفك دى كلنا حسينها
لكن هنعمل ايه
لازم ندور ونشتغل ونكسب ونعيش
ومش هقولك عشان ندوس لكن عشان مش ننداس
تحياتى

منى said...

غربه وطن
اهلا بك

منى said...

صانعه الاحلام
ربنا يستر يا ستى
وعلى ما تتخرجى يكون الحال اتغير
والدنيا بقت احسن
تحياتى

عــلاء ســالـــم said...

السلام عليكم

معاكي حق في كلامك
هو دا الواقع اللي إحنا عايشينه واللي لازم نتعايش معاه طالما مش قادرين نغيرة .

للأسف الشديد أسوء خبر بيتلقاة أي شاب مصري الآن هو خبر تخرجه من الكليه .

ربنا يوفقنا للخير

خالص تحياتي لموضوعك القيم والجميل

"النجم القادم" said...

السلام عليكم
اختنا الفاضلة منى
فينك من زمان
اختى الكبيرة بجد والله
ان الواحد ليحزن حزنا شديدا
عندما يرى خيرة شبابنا بعد ان تعب
وذاكر ليحصل على اعلى الشهادات
وفى الاخر يافرحتى
حسبى الله ونعم الوكيل
وعلى العموم بتوع التربية
مولعينها دروس والانجليزى شغال
ههههههههههههه
بس بجد الواحد لازم يشتغل
وهو فى الكلية انا فى سنة تانية تانى
وشغال الحمد لله
فى كبرى شركات الكمبيوتر والدى اس ال
الحمد لله اخدت خبرة تؤهلنى الحمد لله
للعمل بها بعد ان اخلص كلية
لانى عارف ان مافيش شغل

walaa said...

ليكى عندى تاااج تعالى خديه تحياتى ولاء

ابو العربى said...

كلامك تمام وحكومتنا الموكره بتقول كده برضو بس مين يسمع
لابجد مش عيب ابدا اى حاجه فيها رزق وخلاص اى طريق شريف وخلاص

تحياتى

سلوى said...

طبعا في حكايات ذكرتيها أنا عارفاها

بلديات بقى

المهم
أفكارك عندك حق فيها طبعا

حرفه جنب الدراسه مش هتضر

بالعكس شئ كويس
موضوعك جميل وجامد

دمتى بكل تألق

ا لـعـبـد لـلــه said...

بما اننا أبناء محافظه واحده ..فأنا أتفق معاكي ,احييكي على عنوان المقال لأنه بجد متميز زالمقال فعلا يستاهل القراءة من أوله لآخره .. وانتي معاكي حق لأن المهن الحرة بتوصل صاحبها بسرعه وأفتكر الحكمه الرائعه واللي هي أهم حكمه حاليا...عشان ما نعلى ونعلى ونعلى لازم نطاطي نطاطي نطاطي...بس مش هنطاطي في كل حاجه طبعا

الراقـــص مع الذئـــــاب said...

السلام عليكم
ننتظر الجديد يا اختنا الكريمة

الفارس الملثم said...

طبعا كلامك سليم تماما , وانا كان ليا زملاء عملوا زي ما بتقولي كده , بمعني انهم كانوا عندهم حرف تانية بجانب الدراسة , طبعا خدوا المؤهل العالي بس اشتغلوا في الحرف دي ونجحوا وكونوا نفسهم ..

الشهادة ضرورية جدا بس لو فكرت انك اتشتغل بيها " الا طبعا في بعض الشهادات اللي سوق العمل محتاجها " يبقي عمرك ما تشتغل ابدا ..

موضوعك هام ورائع وطرح سليم للقضية

تقبلي مروري

الربان said...

تحياتي

موضوعك جميل يا مني...و هو جميل لانه يحمل
معاني الامل لكل انسان الا يقف و يبكي
علي اللبن المسكوب...عليه ان يرتب افكارة و يشحذ همته للانطلاق من جديد .

نصيحتي للشباب الا يتوقفوا عن التعلم .. فكل يوم هناك الجديد..
علي سبيل المثال خريج كلية التربية...
امامه فرصة للدراسة و الحصول علي شهادة مهنية في التدريس كمدرس محترف مهني
وخريج كلية التجارة امامه فرص ايضا
ليتأهل مهنيا...فيدرس ليحصل علي شهادة مهنية في المحاسبة و المراجعه..

مشكلة معظم الشباب انهم يكتفون فقط بالشهادة الجامعية و هي شهادة علمية
و ليست مهنية...و الشهادات المهنية اصبحت هي اهم مسوغات التعيين في كل انحاء العالم...


تحياتي و تقديري و تمنياتي للجميع بالتوفيق.

عبدالرحمن الشافعي said...

السلام عليكم ...
صح ..كلامك صح ...
أنا عن نفسي ..واحد صديقنا فاتح صيدلية ....بروح بشتغل عنه كل أجازة ....
والحمد لله إتعلمت حجات كتييييير...
جزاكي الله خيرا على هذا الموضوع القيم ..
وشكرا على البادرة ..
ودمتم

عبدالرحمن الشافعي said...

انا نزلت موضوع جديد ...
أرجو أن تلقي عليه نظرة ...
"من طلب العلا نام الليالي"
تحياتي لكي

arsenalwy said...

لا معاكى حق

يامنى

مع انى ان شاء اللة السنة الجاية هبقى مهندس بترول

الا انى احلم بالعديد من المشروعات التى منها ما يتعلق بالبترول والاخر بعيد كل البعد عن مجال البترول فلا بد للانسان ان يعمل ولا يقف مكبل الايدى

شكرا

سنووايت said...

مفيش عندنا اهتمام باي مهارات
التعليم مجرد كلام علي ورق وفي الاخر بتاخدي ورقة تعلقيها علي الحيطة
أقولك علي حاجة , عندنا في كلية طب اللي عايز يتعلم بجد واقصد هنا المهارة العملية لازم يعتمد علي نفسه صحيح هيتبهدل شوية بس هيتعلم
لكن اللي هيسيب نفسه للتعليم النظري هيطلع مش فاهم الالف من كوز الذرة

دعوة جميلة اقترحتيها في البوست دا وحل يمكن يخرجنا فعلا من دايرة البطالة

أحمد سلامــة said...

اقولك ايه الحل
بردو النظام لازم يتغير بالكامل
مهما الناس تتعلم
لازم النظام يعدل عشلن شوية وسكة الحرفية هتتقفل بردو

ِِAdem El-Mahdy said...

السلام عليكم

انا هقولك حاجة يا ست منى

ممكن الواحد ينمى قدراته من خلال شغله او دراسته مش نظرى و خلاص

بمعنى
انت واحدة خريجة انجليزى
ليه كل تفكيرك يبقى مدرسه

فى اختراع تانى اسمها
English Instructor
انا مديرى فى الشركة
فى IBM Egypt
خريج اداب انجليزى
و بعد التخرج زاكر شويتين فبدأ يدى كورسات انجليزى
و بعدين اتجه لمجال الادارة و
HR
Human Resource
و مجال ادارة الاعمال و ما شاء الله لانه مستسلمش لشغلانه المدرس


كل واحد ممكن يبقى حاجة فى مجاله
مش لازم اتعلم حرفه

المهم تتعلم ازاى تتعلم

و شكرا

بجد مدونة جميلة يا ست منى
و بس
و سلام عليكم
www.ademelmahdy.blogspot.com

عروسة ننوسة said...

عايزة اقولك كلامك كله صح وفى الصميم التعليم للاسف مبقاش ينفع اهى شهادة تتحط فى الاخر على الرف

فتوح أبو المفاتيح said...

السادس من ابريل انتفاضة الشعب المصري
الناس دي كلها معانا
على مدونة عصياااان
http://3syan.blogspot.com/

almasry said...

لو عاوزه نصيحه من أوخوكى اللى عايش بقاله كتير متبكيش وشغلى اغنية متبكيش يازمان .. يابنتى والله انا ما عارف العيب فينا ولا فى الزمان .. حاجه بقت تحير

تحيــــاتى
المصــــــــــرى

منى said...

علاء سالم
وعليكم السلام ورحمه الله وبركاته
خبر تخرجه بقى صدمه
لانه بعد ما كان طالب بقى مطالب بحاجات كتير
والعين بصيره والايد قصيره
تحياتى

منى said...

النجم القادم
ايه يا ابنى ده؟
انت جاى تعلق ولا تحقد؟
هههههههه
ماشاء الله عليك
ربنا يبارك فيك
وانا يشرفنى انى اكون اختك الكبيره
بس مش عجوزه يعنى
ههههههه
تحياتى

منى said...

ولاء
مرسى ليكى
ان شاء الله اجاوبه بسرعه
واشكرك انك اتحتى لى الفرصه دى
تحياتى

منى said...

ضد الظلم
اهلا بك
وشكرا لمرورك ورايك
تحياتى

منى said...

سلوى
مرسيى يا لولو
وادينى يا ستى عملت بالوصيه ومقلتش المثال اياه
افتكروا الجمايل دى
على راى نوجا
تحياتى

منى said...

العبد لله
اهلا بك يا بلدياتى
فاكره علشان ما نعلى دى
تقريبا كان مسلسل انا وانت وبابا فى المشمش
بس مش عارفه بحب اكتر
نخيلك يا مصر تاج الحياه تربع فوق جبين الزمن
يميل حنانا لهمس النسيم وا مال يوما لعصف المحن
تحياتى

منى said...

الراقص مع الذئاب
وعليكم السلام ورحمه الله وبركاته
ان شاء الله قريبا
اشكر لك اهتمامك
تحياتى

منى said...

الفارس الملثم
عندك حق
لو فيه شغل فى مجال دراستك يبقى امر رائع
لكن لو مفيش يبقى لازم نتصرف
تحياتى

منى said...

الربان
اسعدنى تواجدك وتعليقك
وافادنى ايضا
على فكه
ادخل مدونتك من قبل ان تاتى لزياره مدونتى لكنى اواجه مشكله فى التعليق هناك
تحياتى

منى said...

عبد الرحمن ياسين
عقبال ما اشوفك صاحب اكبر صيدليه ولا شركه ادويه كمان
ان شاء الله جايه اشوف جديدك
تحياتى

منى said...

arsenaly
ربنا يوفقك ويحقق كل امانيك
الطموح هو سلاحنا الحقيقى
المهم يقابله جهد
تحياتى

منى said...

سنو وايت
اهلا بكى
عندك حق طبعا
ربنا يوفقك ويبارك فيكى
تحياتى

منى said...

احمد سلامه
حمد الله على السلامه
يمكن عندك حق
بس مش شايف انك متشائم شويتين
تحياتى

منى said...

adem elmahdy
عليكم السلام ورحمه الله وبركاته
انت عندك حق فى كل كلامك
وحكايه المدير عندك مثال لكلامى
انا قلت فى العنوان مهاره مش حرفه
لان طالما عنده مجال للتطور فى تخصصه يبقى خير
وهو استخدم مهاراته اللغويه
والاداريه وطورها
اما عنى ان مدرسه انجليزى كام ساعه فى الاسبوع بس فى مجموعه تقويه للجيران
اما شغلى الاصلى فى جمعيه خيريه
والحمد لله انا دلوقتى مديره النشاط اللى مسئوله عنه
صحيح المرتب خيرى برضه
لكن بحاول يكون عندى نشاط تانى يرضينى ماديا من غير نا يقصر على شغلى اللى بحبه جدا وحاسه انى ناجحه فيه
وكمان بمارس هواياتى بشكل شبه احترافى
تحياتى

منى said...

gannah
هلا بكى
ويا رب اللى جاى يبقى احسن
تحياتى

منى said...

فتوح ابو المفاتيح
ايه ده؟

منى said...

almasry
انا خلصت بكى
معدلوش وقت
بسيبه لحاجات اهم
فكرتنى
نعيب زماننا والعيب فينا
وما لزماننا عيب سوانا
تحياتى

كاريزما said...

أحييكي على الفكر الموزون الجميل

و أوافقك تماما

بس مهما كان .. لسة بلد شهادات

برواز الشهادة .. نعمل اي حاجة هيكون تمام

تشرفنا

zOzO said...

تحياتي ليك مني
موضوعك حلو
ومش تنسي اننا هنا ف مصر
يعني انا مثلا كليه علوم هي بره ف الدول التاهي مطلوبين جدا
انا عارفه لما هخلص كليه هقعد في بيتنا يادوب
او اتجوز
ههههههههههههههههههههههه
عموما تقبلي مروري وخدي بالك تاني مره انك في مصر
وع فكره احنا بلديات
ههههههههههههههههههههه
رحيل قالتلي عليكي
تحيااتي ليكي

secret-love said...

السلام عليكم كلامك صح بس بجد الموضوع صعب ان الواحد يحققه وهو كبير لازم الموضوع ده نبداه مع الجيل الجديد
تحياتى

رفقة عمر said...

موضوع جميل قوى وافكارك رائعه
جزاكى الله كل خير

المـــفـــــــقــــــــوعـــــة مــرارتـهــا said...

المشكلة بتبقي في الشباب المتعلم بيرفض انه يتعلم له صنعة وبيقول مش مقامي رغم ان لوالصناعات دخل فيها المتعلمين هايبقوا أحسن من الصنايعية الجهلة علي الأقل هايحسنوا من الصناعة بأخلاقهم ... وهايخلقوا نوع محترم من المهن اليدوية وهايفرضوا احترامهم علي كل المهن

ابو العربى said...

فى موضوعى هلوكوست فى غزه وحضرتك هتقدرى تساعدينى ياريت تضيفى ميلى عندك عشان نتواصل
kawme2008@hotmail.com
تحياتى

سلوى said...

إيه يا منى إنت فين

وفين الجديد

عساكي بخير يا لولو

ammola said...

فينك يا منى؟؟
حرمانا ليه من الاحاسيس
لعلك بخير
هل تسمعنى؟؟
حوّل
:)

المستنصر بالله said...

من وجهه نظرى ان المراه مكانها البت
سيدات كتير باخذوا جازات من غير مرتب لرعايه بيتها وتترك مكانها محجوز
ودة من اسباب البطاله لو السيدات رجعت ومكثوا فى البيت مرة اخرى
اعتقد مشكله البطاله هاتنحل

منى said...

كاريزما
اشكرك جدا
وفعلا معاك حق
تحياتى

منى said...

zozo
انتى الاحلى يا قطه
عشان احنا فى مصر
لازم نتصرف
وبلديات كمان
لاء دى بقه عايزه كلام كتير
يا ترى رحيل قالت ايه تانى؟
هههههههه
تحياتى يا جميل

منى said...

secret_love
هو فعلا صعب ومر
بس ظروفنا فى بلدنا اصعب وامر
تحياتى

منى said...

رفقه عمر
وجودك هو الاجمل عزيزتى
جزيتى الخير كله
تحياتى

منى said...

مفقوعه مرارتى من حماتى
اولا سلامه مرارتك وربنا يهدى حماتك
والله رايك جميل وفعلا وجهه نظر محترمه
احنا كده ممكن يبقى عندنا مخترعين كمان
ربنا يوفق الجميع
تحياتى

منى said...

ضد الظلم
خلاص
احنا مستنيين موضوعك الجدد
وربنا يوفقنا لما يحب ويرضى
واشكرك على ثقتك
تحياتى

منى said...

سلوى
انا هنا يا لولو
انتى بتدورى هناك ولا ايه؟؟
تسلمى لى يا سلوى
تحياتى

منى said...

ammola
نعم اسمعك
ربنا ميحرمنيش منك ومن سؤالك ابدا
اصل احاسيسى كانت كئيبه اليومين اللى فاتوا
قلت اقعد فى جنب شويه بدل ما انكد على الناس
حول
تحياتى يا احلى اموله

منى said...

المستنصر بالله
حكايه عمل المراه دى موضوع كبير
مرتبط بها وظروفها
يعنى افرض واحده عايزه تقعد فى البيت لكن مرتب جوزها قليل
او حتى ارمله
يعنى ده موضوع كبير
تحياتى
وبالمناسبه
مبرووك

مجداوية said...

ازاى مدخلتش مدونتك قبل كده !!!!
انت نموذج واعى جدا وفكر عالى وانا باحترم اللى عندها فكر من النساء ودول مبقوش كتير للآسف الأيام دى ,وربنا يبارك فى عمرك وفكرك
مفيش عمر للتعلم وكلامك كله صح البكالوريوس ولا الليسانس بقوا دلوقت يساوى الاعدادية اللى عايز يكون حاجة البداية هى حصوله على المؤهل الجامعى ولازم يكمل لو عايز يكون له مكان فى العالم الجنونى السرعة والجنونى فى العقل

سعدت بزيارتك عزيزتى والى لقاء آخر

منى said...

مجداويه
هو ده بقى التعليق اللى كان ضايع يبدو انه جه هنا غلط
اشكرك بشده على كلامك الجميل
بجد اسعدتينى
ربنا يبارك فيكى
تحياتى

Dr. Ibrahim said...

من حقنا نحلم ونحاول ان نحقق الحلم ده
بس
طول ما حنا حاطين ايدنا على خدنا طول ما حنا هنام فى العسل
والحياة عايزة الوقتى اللى يعمل من الفسيخ شربات
وعايزة الفهلوى بس كله إلا الحرام
ومعدش الشبكة ولا حتى السمكة حد بيعطيهم عادت الشبكة والسمكة انتا اللى تجيبهم يا شطوور
و دا من ذنوبنا والله يا جماعة
وربنا يستر علينا
ملحوظة على فكرة احنا جيران بقى انا من مدينة جنب المنصورة برده
د/هيما