Sunday, January 6, 2008

تاج

تاج من سلوى
اختار اى عصر من عصور مصر تعيش فيه وفى عهد اى حاكم واشمعنى؟
بصراحه محتاره عموما اى عصر اكون فيه مفيده
اول اولويه فى حياتك
عيلتك ولا شغلك ولا اصحابك؟
والله فى العام يبقى عيلتى،لكن كل حاجه من الثلاثه تبقى اهم فى الوقت اللى محتجانى اكتر
ايه اكتر حاجه بتحبها فى رمضان؟
لاء ده سر بقى
اوصف اجمل افطار ممكن تفطره؟
اجمل افطار تكون العيله الكبيره كلها موجوده والاكل اللى كل واحد بيحبه موجود وطبعا اكون انا اللى عامله الاكل كله ومحضره السفره
لو انت حاكم على مجموعه هتكون عادل؟ وهتتاكد ازاى انك حاكم عادل؟
والله كلكم راعى وكل مسئول عن رعيته
يعنى بحاول احقق العدل مع اللى مسئوله عنهم
لكن النتيجه يعلمها الله
ايه اللى بيبوظ الحكام ،نفسهم ولا الشعب ولا الحاشيه المقربه؟
اعتقد انه كوكتيل من ده كله
مين اكتر اعلامى مصرى بتحترمه؟
حمدى قنديل مع انى بقالى سنين مشفتش برنامج له ومنى الشاذلى
والاستاذ الكبير كامل زهيرى
لو ممكن تشتغل شغلانه تانيه كنت تحب تشتغل ايه؟
من كام سنه كنت عايزه ابقى صحفيه دلوقتى عايزه ابقى صاحبه مطعم وحلوانى
ايه اكتر بلد تحب تعيش فيها بعد مصر؟
انا احب ازور بلاد كتير قوى ،لكن مش متخيله اعيش فى مكان تانى غير مصر
اوصف ترتيبات اجمل فرح ممكن تحضره؟
اقولكم بس يبقى لى نسبه من الارباح
الفرح يكون فى مكان واسع او جنينه كبيره وياريت لو فيها فل وياسمين ترابيزات صغيره فى كل حته كل واحده عليها صينيه عليها مفرش صغير وفيها صابون ريحته حلوه وملون مبشور زى ورق الورد لان بصراحه ميهنش عليه اقطع الورد
ووسط كل صينيه شمعدان وشمع جميل
والاضواء على الشجر او سور الجنينه هاديه لمبات صغيره
lميكونش فيه اى حاجه حرام عشان نفرح بجد
ولو فيه اكل برضه انا اللى اجهزه
ههههههه
السؤال ده جاوبته بضمير اوى
بتراعى كلام الناس والقيل والقال ؟لو ايوه او لاء قول ليه؟
بصراحه ان بيهمنى الناس
يعنى محبش حد يزعل منى
لكن انا بعمل اللى اشوفه صح ومياذيش الناس دى
لكن فى ناس لو خت بكلامهم نروح فى داهيه دنيا واخره والعياذ بالله
صحيت من النوم ملقيتش الموبايل ولا الكاميرا الديجيتال ولا الكمبيوتر ورجعنا لعصر الحمام الزاجل والاحصنه هتكون سعيد؟
والله لو الكلام ده قبل ما اعمل المدونه
ابقى سعيده جدا
انا لحد قريب كنت بقول انا مبحبش التكنلوجيا وبكره الكمبيوتر
والمبانى العاليه وعربيات النقل
السعاده هى ؟
الرضا
عندك امل؟اسبابك؟
طبعا عندى ،ربنا موجود
لما تحب تهرب من كل شئ بتروح فين؟
اما اطلع على السطوح او انام للاسف مفيش مكان تانى
امتى اول مره خت نفس طويل وقلت ياه انا فعلا كبرت؟
ياه انا بقولها من زمان قوى من قبل ما اكبر بجد
لما بتعمل عمل خير بيكون ايه دافعك الاول؟
الله اعلم
بتشرب سجاير؟ وايه شعورك لما تلاقى ست او راجل بيشرب سجاير؟
لاء الحمد لله مبدخنش
وبصراحه بحس انى بظلمهم لانى مش برتاح فى وجود حد بيدخن
بتعرف ايدك اليمين من الشمال ازاى؟
اخ ...جيت على الجرح
بعمل حاجه غريبه جدا بس تلقائيه
احط الاتنين قدامى وبعدين الاقى اليمين مشت لوحدها وسابت الشمال
فى رايك ليه الذوق والنخوه انعدموا؟
مين قال كده؟
وطالما لسه بنسال عليهم يبقوا موجودين بس يمكن مش كتير
ايه الحاجه اللى لو حصلت تبقى سعيد قوى؟
اى حاجه حلوه تحصل ليا او لاى حد كويس فى اى حته واعرفها هبقى مبسوطه اصل انا بتلصم عايزه ابقى سعيده يا ناس
عايز يبقى عندك ارض زراعيه ولا اجنس عربيات ولا كام عماره ولا فلوس فى البنك؟
ياريت لو حته ارض تقضى بيت وجنينه
وجزء نزرعه وناكل منه واعمل المصنع اللى فى بالي وعماره عشان العيال ومشاريعى العبقريه

البحر ولا النيل؟
البحر لو هقعد جنبه او كان فيه فرصه انزله بس بالنهار بس
مركب ولا طياره؟
مركب بس فى النيل مش فى البحر
مجنون ولا عاقل؟
زى معظم الناس من ده على ده
تقرا كتاب ولا تتفرج على فيلم؟
لو فيه وقت وصحه يبقى كتاب
تمرر التاج لمين؟
يا ريت كل اللى مجوبهوش يجاوبه يا جماعه بجد هكون سعيده قوى

58 comments:

الراقص مع الذئاب said...

السلام عليكم
تاج جميل وإجابات محترمة
ومدونة محترمة

اعجبني جدا موضوع
لو التزموا ما حزنوا

جزاك الله خيرا

secretlove said...

بجد انا اول مره اقرافيها تاج فى حياتى ومكنتش اعرف يعنى ايه تاج بس بجد رائع

عصفور المدينة said...

الناس معظمهم قالوا مجنون على عاقل حتى أنا سبحان الله ظاهرة تستحق الدراسة

ربنا يحفظك ويديم علينا وعليكم نعمه

صاحب المضيفة said...

اجابات رايقة ودبلوماسية شوية

لكن في المجمل


حلوة جدا

ربنا يبارك فيكي ويحفظك


سلام

رفقة عمر said...

اجاباتك جميله قوى
وعجبنى طريقه الفرح اسمحيلى استلف الفكرة منك
وماتقلقيش
خالص الملكيه الفكريه محفوظه ليكى طبعا

هبههههووب said...

انا دخلت مدونتك وكان نفسى اقرأ لك شىء
وفرحت اوى لما لقيت بوست جديد وخصوا انه تاج انا اصلى بحب التاج وطريقه طرح الاسئله اوى
بجد حلو يا قمرة
ونفسى يتبعت لى اسألك واجاوب عليها ..فى ناس نوياها فعلا بس لسه مستنيه
ايجاباتك حلوة اوى وهذا ان دل على شىء انما يدل على شخصيه جميله ورائعه ومتدينه ومرحه وعاقله
انت انسانه حسيه اوى
ربنا يكملك بعقلك ويزيدك من نعيمه ويكتب لك كل خير وسعادة
وكل سنه وانتى طيبه بمناسبه العام الهجرى الجديد

ammola said...

منى الغالية
صحيح القناعة كنز لا يفنى..عايزة ارض وعليها بيت ومزرعة وعمارة ومصنع وطبعا من فلوسه حتجيبى عربيات مش عربية واحدة..ماشاء الله فعلا ذكاء الانثى اخدت حتة الارض وجابت منها كل حاجة
ربنا يخليكى يا منى ويخللى مدونتك لانها سبب سعادة مبهمة ليا

أحمد مصطفى said...

تحياتى وعتابى

اغيب كل دا ومفيش كومنت

حتى عيب تخونك

المدونات ؟؟؟؟؟؟؟؟؟


تحياتى

أحمد مصطفى

منى said...

الراقص مع الذئاب
وعليكم السلام ورحمه الله وبركاته
الحمد لله ان مدونتى المتواضعه نالت اعجابك
ووصفتها بالمحترمه
وهذا اقصى ما اتمناه
تحياتى اخى
واتمنى تكرار الزياره

منى said...

secret love
يعنى اتعرفت على التاج عندى؟
بالمناسبه السعيده دى
اهديك التاج
وهنيجى نشوف الاجابات
تحياتى

منى said...

عصفور المدينه
شفت بقى
يعنى حتى حضرتك قلت مجنون على عاقل
هبقى انا يعنى اللى عاقله على طول؟
ربنا يكرمك يا رب
وعلى فكره بقالى كام يوم مش عارفه ادخل مدونه حضرتك وبصراحه مش عارفه المشكله فى ايه؟
والموضوع ده بيحصلى مع مدونات تانيه برضه وبيغظنى جدا

منى said...

صاحب المضيفه
ربنا يكرمك
وان شاء الله نشوف اجاباتك قريب

منى said...

رفقه عمر
منوره المدونه ومنورانى شخصي
وطبعا الفرح بتجهيزاته تحت امرك
بس متنسيش تعزمينى
تحياتى يا جميله

منى said...

هبهههههههوب
ايه ده كله؟
انا كل الحاجات الحلو دى؟
ده بس من ذوقك والله
صاحب القلب الحلو بيشوف كل حاجه حلوه
وعلى الفكره التاج ده ان شاء الله لازم تجاوبيه ويا ريت يبقى هو البوست الجديد عندك
مستنيه اشوف اجاباتك
تحياتى يا غاليه

منى said...

اموله حبيبتى
اه طبعا قناعه امال ايه تقدرى تقولى حاجه تانيه؟
ههههههه
المهم
ربنا يجازيكى خير يا اموله على الكلام الجميل ده اللى بجد اسعدنى
تقريبا كده القلوب عند بعضها
عايزه اقول حاجه بس مكسوفه افهميها انتى بقى

منى said...

احمد مصطفى
حمد الله على السلامه
انت قولت انك عايز اجازه ورغم اعتراضى
لكن تم السماح بالاجازه باغلبيه الاصوات
وكنت متابعه المدونه بس سايبينك براحتك
يعنى عدانى العيب
عموماحقك علينابرضه
تحياتى اخى

محمد علي باشا said...

أنا أهنيكي على الإجابات الواضحة والصريحة والرائعة أيضا ويارب يوفقك في حياتك وتكتبلنا من أفكار مشاريعك العبقرية وأنا برضه من المنصورة وساكن في حي الجامعة وأنا أبقى إبن عمة عبدالرحمن ياسين بس أنا أكبر منه شويه ويسعدني أن أكون أحد المعلقين في مدونتك الجميلة هذه
والسلام عليكم

نوسه said...

ترتيبات الفرح دى فى دماغى وربناااااااااااااااااا
بس مش لاقيين لسه مكان واسع نعمل فيه الحاجات دى وممكن يبقى غالى اوى
سيبكككككك المهمممممم
جايه اقولك حمدالله على السلامه ياقمرر

منى said...

محمد على باشا
باشا مره واحده وكمان قريب عبد الرحمن
يا الف اهلا
ومتشكره جدا على الاطراء
اما عن مشاريعى فلو كتبت عنها جايو تطلع لا عبقريه ولا حاجه
موما
اسعدتنى زيارتك وارجو تكرارها

منى said...

نوسه
الله يسلمك يا حبيبتى
ويا رب اسمع عنك دايما كل خير
اما عن الفرح متشيليش هم
قبله بشويه ابعتيلى و بيتهيقلى انتى زى مش من المنصوره نفسها
وان شاء الله هلاقيلك المكان ومن غير فلوس كمان
هو احنا بنلعب يا بنتى
تحياتى

DR.HAMAS said...

أكرمك الله أختنا منى

إجاباتك جميلة فعلا

و فيها حاجات طريفة كمان
هههههههههه

جزاكم الله خيرا


د.حمـــاس

ammola said...

احنا فى بيننا كسوف برضة يامنى؟عايزة كام؟
:)

doha said...

الف مبروك التاج يامنى
والله تستحقيه يابنتى
كل سنة وانتى طيبة يامنى

منى said...

د.حماس
الحمد لله ان التاج عجبك
وكمان بتضحك
ربنا يكرمك
ومنور دايما ان شاء الله

منى said...

اموله
يعنى دايما كده فقسانى؟
يعنى مصممه تعرفى
بس متخليش حد تانى يقراها
انا ببعتلك بوسه
هه
يا كسوفى!

منى said...

دوحه
وانت طيب
ومرسيي لك جدا
يلا بقى ورينا اجاباتك
التاج تاجك
تحياتى

walaa said...

جميله قوى اجاباتك يا منى وانابحب اللمه زيك فعلا احلى فطار لما العيله بتبقى ملمومه
ربنا يكرمك ويحققلك احلامك
ثم انت عايزه عماره للعيال هو انت ناويه تخلفى دسته هههههههههه
تحياتى لك بالعطور الفرنسيه ولاء

ra7eel said...

منى
اجابات فعلا جميله

بس ايه موضوع الاكل والعزومه لاء وكمان عايزه تفتحى مطعم
انا شكلى هعزم نفسى على الغدا والعشا كمان
هههههههه
حلو قوى ترتيبات الفرح
تحياتى وحبى ويارب نتقابل قريب

رئيس جمهوريه نفسى said...

كل سنه وانتى طيبه اولا انا جربت التاج قبل كده فبتنازل عنه للى مجربش
وفعلا اجابات تنم عن شخصيه محترمه جدا

klmat said...

تاج جميل
واجابابات جميله
وصفك للفرح جميل
ومش هاين عليك الورد
منتهى الرقه
ربنا يسعدك ويوفقك ياااارب
تحياتى وسلامى

احمد الجيزاوى said...

بصى ركزى شويه انا قرات التاج وحلو و 100 فى 100
بس فيكى حاجه حلوة فى اجابتك بس مش عرف ايه
يمكن البساطه او تلقائيه مش عرف بس عموما
ممتاز
احمد الجيزاوى

بحبك يامصر said...

اجاباتك جميله بجد واحلى اجابه عجبتنى ردك على ما هيه السعاده؟ انتى قلتى الرضا
وفعلا الرضا هو السعاده لان الواحد مهما كان حاله ولو مرديش بيه عمره ما هيكون سعيد اما لو رضى بحاله هيكون سعيد
ومبسوط

bedo said...

طبعا وبغض النظر عن الطموح الواضح جدا في العمل
يعني من صحفية لصاحبة مطعم ...! مش عارف
أو إنك بتحبي الأكل فيمكن هنا نبص للموضوع نظرة تانية

أما بالنسبة لموضوع الفرح والجو الجميل إللي حضرتك رسمتيه
إيه لازمة الصابون أبو ريحة
هوه عندكم الناس بتاكل في الأفراح صابون بس بريحة ولا ده بعد الحلو مع الشاي بيبقى له طعم تاني

أما بالنسبة لباقي الإجابات فحلوة بصراحة

وبدون زعل

وجزاكم الله خيرا

ودمتم بكل خير

منى said...

ولاء
ايه اخبارك؟
ربنا يكرمك يا ولاء
ونشوفك كده قريب فى لمه حلوه من دول
على فكره العيال دول اقصد بيهم اخواتى
اصلى انا الكبيره ومتعوده دايما اقول عليهم العيال
الله على ريحه تحياتك يا ولاء
تحياتى يا جميل

منى said...

رحيل
انتى تنورى
تعالى انتى بس ومش هتندمى
اقولك
انا هاجى اخطفك
تحياتى والى لقاء قريب
ان شاء الله

Salwa said...

شكرا يا لولو على إجابتك للتاج

إجاباتك كلها جميله

ربنا يوفقك يا منى

دمتى بحفظ الله

منى said...

رئيس الجمهوريه
كل سنه وانت طيب
ومرسيى جدا على رايك
تحياتى

منى said...

klmat
عزيزتى كلمات
ربنا يكرمك ويجازيكى كل خير
مرسيي قوى على ذوقك
تحياتى وتقديرى

منى said...

احمد الجيزاوى
شكرا جدا ليك
وجزيت كل خير

منى said...

بحبك يا مصر
يارب يوعدنا بالرضا جميعا
ويسعدنا دنيا واخره

منى said...

bedo
اولا اهلا بك
ثانيا بالنسبه للطموح
انا حققت جزء من حلم الصحافه وبمارسها دلوقتى ولو بقدر بسيط
بس حسب ظروفى الجزء ده يكفينى
واما بالنسبه للمطعم بيتهيقلى صاحب المطعم الناجح احسن من صحفى او حتى وزير فاشل
وطبعا لمااحلم بحلم بالنجاح

اما الصابون
انا قلت بريحه عشان المكان كله يبقى ريحته حلوه والصابون ده هيتحط مع الشمع ديكور يعنى
اصل الناس اللى فى بلدنا يشبهوا اللى فى بلدكم شويه يعنى ومش بياكلوا صابون مع الشاى او غيره
تحياتى

منى said...

سلوى الجميله
منوره يا لولو
مرسيي خالص
ربنا يكرمك

أحمد سلامــه said...

:)
السعادة في الرضا
برافو
بجد برافو
وكويس انك بتحسي انك بتظلمي المدخنين عشان كده ممكن كمان هم ايحسو انهم بيظلموكي ويخففو عالاقل

تاج لذيذ
كل سنة وانتي طيبة

DR.HAMAS said...

اختنا الكريمة

اجاباتك جميلة فعلا

و فيه منها طريف اوى

ربنا يكرمك يا رب

و يعطيكى ما تتمنى



د.حمــــــاس

أنا إنسان said...

أخلاقنا...اسلامنا
إيمانا منا بأن حال العالم ...لم ولن ينصلح... إلا بالاسلام
وإيمانا منا بأن اسلامنا...لم ولن ينصلح ...إلا باأخلاق
اتفقنا...أو وفق الله بيننا ...لتكوين أول حملة للأخلاق...لتحقيقها...والسمو بها...والعمل بها بإذن الله
...................
من نحن
مجموعة من الشباب ...أهمهم حال أمتنا...وعروبتنا...وأوطاننا
فوفق الله بينناعلى الإجتماع على هذه الحملة...ولنطلقها حتى تصل إلى عنان السماء...علها تشفع لنا يوم القيامة
وبإذن الله ... سوف نعلن في البوست القادم عن المدونات والمواقع التي تدعم هذه الحملة
...................
وقد تم بحمد الله إنشاء مجموعة أخلاقنا إسلامنا البريدية على
yahoo groups
وسننشر بها ان شاء الله ما يتم انزاله من مقالات وفعاليات الحملة
وللاشتراك في الحملة...اضغط على الرابط التالي
http://groups.yahoo.com/group/akhlakona/
Group Email Addresses
Related Link
http://groups.yahoo.com/group/akhlakona/www.ana-insan.blogspot.com

أنا إنسان said...

أخلاقنا...اسلامنا
إيمانا منا بأن حال العالم ...لم ولن ينصلح... إلا بالاسلام
وإيمانا منا بأن اسلامنا...لم ولن ينصلح ...إلا باأخلاق
اتفقنا...أو وفق الله بيننا ...لتكوين أول حملة للأخلاق...لتحقيقها...والسمو بها...والعمل بها بإذن الله
...................
من نحن
مجموعة من الشباب ...أهمهم حال أمتنا...وعروبتنا...وأوطاننا
فوفق الله بينناعلى الإجتماع على هذه الحملة...ولنطلقها حتى تصل إلى عنان السماء...علها تشفع لنا يوم القيامة
وبإذن الله ... سوف نعلن في البوست القادم عن المدونات والمواقع التي تدعم هذه الحملة
...................
وقد تم بحمد الله إنشاء مجموعة أخلاقنا إسلامنا البريدية على
yahoo groups
وسننشر بها ان شاء الله ما يتم انزاله من مقالات وفعاليات الحملة
وللاشتراك في الحملة...اضغط على الرابط التالي
http://groups.yahoo.com/group/akhlakona/
Group Email Addresses
Related Link
http://groups.yahoo.com/group/akhlakona/www.ana-insan.blogspot.com

ابوزياد الفاتح said...

الصراحه اجابات حلوه جدا والمدونه كلها جميله جدا والله
ان شاء الله ازورها كتير
وشكرا لزيارتك

صالح سعيد said...

السلام عليكم
اول مره ازور مدونتك
وهى جميله بجد
اتمنى تشرفينى بزيارتك لمدونتى الغلبانه
ارق تحية

النجم القادم said...

السلام عليكم

اول زيارة

بس مش هتكون الاخيرة

بإذن الله

قولى ياااااااارب

بجد اجابات جميلة

ربنا يباركلك

والى الامام دائماً

تحياتى

منى said...

احمد سلامه
كل سنه وانت طيب
شكرا على التشجيع الجامد
شكلك كده منهم
تحياتى

منى said...

د/حماس
اهلا مره تانيه
و
شكرا جدا ليك ولدعواتك الجميله
اللهم تقبل منى ومنك

منى said...

انسان
الفكره جميله وفعلا محتاجنها
هتدخل واشوف التفاصيل
تحياتى

منى said...

ابو زياد الفاتح
شكرا لك اخى
واهلا ومرحبا بك دوما

منى said...

صالح سعيد
اهلا بك
وشكرا لك
وان شاء الله ازورك قريبا تحياتى

منى said...

النجم القادم
وعليكم السلام ورحمه الله وبركاته اهلا بك
يارب
ربنا يكرمك ويوفقك
تحياتى

فتوح أبو المفاتيح said...

حلو أوي موضوع التاج دا

واجابة حلوة على السؤال التاني

على فركة حمدي قنديل بيعمل برنامج اسمه
قلم رصاص
على قناة أبو ظبي

بس سؤال
انت ليه مش بتكتبي بوستات جديدة

فتوح أبو المفاتيح said...

يعني ايه تااااج ؟؟؟
وإزاي ابعت تاااج لحد ؟؟؟
نفسي من زمان أسل حد السؤال ده ومكسوووف

طب أنا عاوز أسألك انت سؤال
واعتبريه انه تاااج

واحد صاحبي عزيز عليا
هو شاف إني زعلان لما قرا على مدونتي
قام سألني
انت ليه زعلان
انا قلت
انا مش بقول لحد على زعلي و انا ليه زعلان
قام هو محول الموضوع
هو يبقا انا كدا قفلته ؟؟؟
وهو زعل مني
هل يمكن انه يكون حس انه بلا قيمة عندي ؟

منى said...

فتوح
اهلا بك

بالنسبه لسؤال التاج
مفيش داعى للكسوف كلنا اخوات
وانا سعيده انك سالتنى
انا كمان كنت حيرانه انا شيفاه مجموعه اساله وكل واحد يجاوب عليهم طب جابهم منين تلاقى واحد تانى كان بيجاوب عليهم وبعتله التاج يعنى ايه
؟
يعنى انا دلوقتى بقول انا هبعت التاج ده لمفتاح وفلا ن وفلانه
يبقى كل واحد من دول ينقل الاسئله ويجاوب عنها بطريقته فى مدونته

اما ليه سموه كده
جه فى بالى تاج كويتشن
اللى هو السؤال المزيل فى الانجليزى بس ده مينطبقش على التاج بتاع المدونات
لقيت مره واحد كاتب تاج ووسام
فهو تقريبا كان فى الاصل تكريم من المدونين لبعض ومحاوله للتقريب بينهم
اسفه انى طولت عليكى
بس انت سالت وحبيت ادى السؤال حقه

اما السؤال الاصعب
عن صاحبك
مش عارفه صاحبك بيفكر ازاى؟
بس انا لو مكانه كنت عملت زيه
عشان محسش انى بتقل عليكى
وطالما عزيز عليا بعد شويه هسال تانى او على الاقل احاول اطلعه من المود ده
بس لو حاسس ان صحبك بيحبك بجد وفضفضتك مش هتجرح حد
قوله واحكيله
يمكن تستريح شويه
وهو كمان هيفرح لما يحس انك مطمنله وانه خفف عنك
ياريت يكون كلامى مفيد
تحياتى